Oct 02,2022 22:25

ముంబయి: టీ20ల్లోనే బెన్‌ స్టోక్స్‌ కంటే హార్దిక్‌ ఉత్తమ ఆల్‌ రౌండర్‌ అని ఆస్ట్రేలియా మాజీ ఆల్‌రౌండర్‌ షేన్‌ వాట్సన్‌ పేర్కొన్నాడు. టీ20 ప్రపంచ కప్‌ ప్రారంభానికి ఇంకో రెండు వారాలు మాత్రమే మిగిలుంది. ఇప్పటికే జట్లన్నీ సమాయత్తం అవుతుండగా.. విశ్లేషకులు కూడా ఫేవరేట్‌ టీమ్‌, కీలకంగా మారే ఆటగాళ్లు ఎవరనేది అంచనా వేస్తున్నారు. మెగా టోర్నీలో ఏ ఆల్‌రౌండర్‌ రాణిస్తాడనే చర్చ కొనసాగుతోంది. మరీ ముఖ్యంగా టీమ్‌ఇండియా ఆటగాడు హార్దిక్‌ పాండ్య.. ఇంగ్లాండ్‌ ప్లేయర్‌ బెన్‌ స్టోక్స్‌ మధ్యే పోటీ జరుగుతోంది. లెజెండ్స్‌ లీగ్‌ క్రికెట్‌ టోర్నీలో ఆడుతోన్న వాట్సన్‌ తాజాగా స్పందించాడు.
''ప్రస్తుతం హార్దిక్‌ పాండ్య అత్యుత్తమ ఫామ్‌లో ఉన్నాడు. ఇలాంటప్పుడు అతడి ఆటను చూడటం బాగుంటుంది. ఫాస్ట్‌ బౌలింగ్‌ ఆల్‌రౌండర్లు జట్టులో ఉండటం నాకిష్టం. ప్రత్యర్థి నుంచి ఎలాంటి సమయంలోనైనా మ్యాచ్‌ను లాగేసుకోగల సత్తా హార్దిక్‌కు ఉంది. బ్యాట్‌తోనైనా.. బంతితోనైనా రాణించగలడు. అందుకే టీ20 ఫార్మాట్‌లో బెన్‌ స్టోక్స్‌ కంటే హార్దిక్‌ శక్తిసామర్థ్యాలు అధికమని నా భావన'' అని వాట్సన్‌ వెల్లడించాడు. భారత టీ20 లీగ్‌ గత సీజన్‌ ముందు వరకు గాయాల కారణంగా జట్టులో స్థానం సుస్థిరం చేసుకోలేకపోయిన హార్దిక్‌ పాండ్య.. ఆ తర్వాత గుజరాత్‌కు కెప్టెన్‌గా టైటిల్‌ అందించడంతోపాటు ఫామ్‌ అందిపుచ్చుకొని ద్వైపాక్షిక సిరీసుల్లో రాణిస్తున్నాడు. దీంతో వచ్చే టీ20 ప్రపంచకప్‌లో టీమ్‌ఇండియా తరఫున కీలక పాత్ర పోషిస్తాడని అంతా అంచనా వేస్తున్నారు.