- ఇటలీ, స్పెయిన్‌లో కార్మికుల భారీ సమ్మె
రోమ్‌ : వేతనాలు పెంచాలని, ఉక్రెయిన్‌కు ఆయుధ సరఫరా నిలిపివేయాలని డిమాండ్‌ చేస్తూ ఇటలీ, స్పెయిన్‌ల్లో శుక్రవారం భారీ ఎత్తున సమ్మె జరిగింది. ఉక్రెయిన్‌లో శాంతి స్థాపన కోసం డిమాండ్‌ చేశారు. నెలకు 300 యూరోల వేతనాన్ని పెంచాలని, గంటకు కనీసం 10 యూరోల వేతనం ఇవ్వాలని కార్మికులు డిమాండ్‌ చేశారు. 'బ్రతకడానికి పని చేయండి, పని చేయడానికి జీవించడం కాదు' అని కార్మికులు నినాదాలు చేశారు. ఇటలీ రాజధాని రోమ్‌తో పాటు, ఇతర నగరాల్లోనూ కార్మికులు ర్యాలీలు నిర్వహించారు. వేలాది మంది ఈ ర్యాలీల్లో పాల్గన్నారు. దేశం ఎదుర్కొంటున్న ఆర్థిక సమస్యలు, అధిక ద్రవ్యోల్బణం, తక్కువ వేతనాలు వంటి సమస్యలకు ప్రభుత్వం అనుసరిస్తున్న 'యుద్ధపూరిత విధానాలు' కారణమని నిరసనకారులు విమర్శించారు. ఉక్రెయిన్‌కు ఆయుధాల సరఫరాను నిలిపివేయాలని డిమాండ్‌ చేశారు.
స్పెయిన్‌లో ఇలాంటి ర్యాలీలే జరిగాయి. వేతనాలు పెంచాలని, 'ఆరోగ్యాంవిద్యను ప్రైవేటీకరించవద్దు' అని, 'ఆరోగ్యం, విద్యా రంగాల్లో మరిని పెట్టుబడులు పెట్టాలని' నినాదాలతో స్పెయిన్‌ రాజధాని మాడ్రిడ్‌లో వేలాది మంది ర్యాలీ నిర్వహించారు. ఉక్రెయిన్‌ యుద్ధం కారణంగా ఇంధన, ఆహార ధరలు పెరిగిపోయాయని ఆందోళనకారులు ఆరోపించారు.
- సిఐటియు అభినందనలు
ఇటలీలో సమ్మె విజయవంతమైనందుకు సిఐటియు ఆ దేశ కార్మిక లోకానికి సిఐటియు అభినందనలు తెలిపింది. ఈ మేరకు శనివారం ఒక ప్రకటన విడుదల చేసింది. యూనియన్‌ సిండకేల్‌ డి బేస్‌ (యుఎస్‌బి) బ్యానర్‌ కింద జరిగిన ఈ సమ్మె విజయవంతం కావడం శ్రామిక వర్గం పట్ల ఇటలీ ప్రభుత్వం అనుసరిస్తున్న వ్యతిరేక విధానాలపై ఉన్న ఆగ్రహనికి నిదర్శనమని తెలిపింది. కార్మికుల జీవితాలు, జీవనోపాధిపై హద్దులేని దాడులు, పెరుగుతున్న ద్రవ్యోల్బణం, నిరుద్యోగం, అధ్వాన్నమైన కార్మికులు ఉద్యోగ భద్రతకు వ్యతిరేకంగా ఈ నెల 26న సమ్మె జరిగిందని సిఐటియు తెలిపింది. ఇటలీలో ప్రధానమంత్రి జార్జియా మెలోని నేతృత్వంలో నయా ఫాసిస్ట్‌ ప్రభుత్వం ఏర్పడిన తరువాత వేతనాలు తగ్గించడం వంటి చర్యలు ద్వారా కార్మికులపై దాడులు ప్రారంభమయ్యాయని, అదే సమయంలో కార్పొరేట్‌, పెట్టుబడిదారీ వర్గాలకు అనుకూల విధానాలు అమలవుతున్నాయని సిఐటియు విమర్శించింది. కార్మికుల న్యాయమైన డిమాండ్లను ఇటలీ ప్రభుత్వం పట్టించుకోవాలని సిఐటియు విజ్ఞప్తి చేసింది.
