ప్రజాశక్తి-యర్రగొండపాలెం : యర్రగొండపాలెం మండలంలోని బోయలపల్లిలో జరుగుతున్న గ్రామీణ ఉపాధి హామీ పథకం పనులను ఎంపీడీవో బండారు శ్రీనివాసులు మంగళవారం ఆకస్మికంగా తనిఖీ చేశారు. ఊహించని ఈ తనిఖీతో కూలీలు, సిబ్బంది అప్రమత్తమయ్యారు. కూలీలు చేస్తున్న పనులను ఆయన వ్యక్తిగతంగా పరిశీలించడంతో పాటు, అక్కడి పరిస్థితులు, అందుతున్న సౌకర్యాలపై సమగ్ర సమాచారం సేకరించారు. పనితీరును గమనించిన అనంతరం బండారు శ్రీనివాసులు ఉపాధి సిబ్బందికి పలు సూచనలు చేశారు. ప్రభుత్వ నిబంధనల మేరకు పనులు నిర్వహించాలని, ప్రతి కూలీ రోజుకు రూ.307 వేతనం పొందాలని స్పష్టంగా ఆదేశించారు. కూలీల హక్కులు, వారికి లభించే ప్రయోజనాలపై విపులంగా వివరించారు. పనులు పారదర్శకంగా సాగేలా శ్రద్ధ వహించాలనీ, నిబంధనలకు విరుద్ధంగా ఏ ఒక్క కార్యాచరణ చోటుచేసుకోకూడదని హెచ్చరించారు. ప్రభుత్వం ప్రవేశపెట్టిన పథకాలు నిజమైన లబ్ధిదారులకు చేరేలా చర్యలు తీసుకుంటున్నట్లు తెలిపారు. అనంతరం ఉపాధి నిధులతో సాగవుతున్న జామతోటను పరిశీలించారు. ప్రభుత్వం మెయింటెనెన్స్‌ ఖర్చులు ఇస్తున్నందున జామ మొక్కలు చనిపోకుండా నీటి తడులు పెట్టాలని రైతును ఆదేశించారు. ఈ కార్యక్రమంలో ఉపాధి సిబ్బంది పాల్గొన్నారు.
తాజా వార్తలు
