వీఆర్ఏల సమస్యలు పరిష్కారం చేయాలి

జెసికి వినతిపత్రం అందజేసిన వీఆర్ఏ నాయకత్వం
ప్రజాశక్తి-కడప అర్బన్ : వీఆర్ఏల సమస్యలు పరిష్కరించాలని ఏపీ వీఆర్ఏల సంఘం జిల్లా గౌరవ అధ్యక్షులు మనోహర్, జిల్లా అధ్యక్ష కార్యదర్శులు నాగేంద్ర, వెంకటపతి కోరారు. బుధవారం జాయింట్ కలెక్టర్ కి వినతిపత్రం అందజేశారు. ఈ సందర్భంగా వారు మాట్లాడుతూ 2014 సంవత్సరం నుంచి గ్రామ సేవకులకు వేతనాలు పెంచలేదని,వేతనాలు పెంచాలని విజ్ఞప్తి చేశారు. ఇచ్చే వేతనం ఏ మూలకు సరిపోవడంలేదని ఆవేదన వ్యక్తం చేశారు. కూటమి ప్రభుత్వం అధికారంలోకి వచ్చి 9 నెలలు గడిచిన వీఆర్ఏల సమస్య లు ఏ ఒక్కటి పరిష్కారం కాలేదని తెలిపారు. రాష్ట్రంలో మంత్రులు, ముఖ్యమంత్రులు మారుతున్నారు కానీ వీఆర్ఏల కష్టాలు, సమస్యలు తీర్చేవారు లేరని పేర్కొన్నారు. తెలంగాణ రాష్ట్రంలో వీఆర్ఏలకు పేస్కేలు ఇచ్చి ప్రభుత్వం ఆదుకుంటుందని తెలిపారు. మన రాష్ట్రంలో కూడా వీఆర్ఏలకు పే స్కేల్ అమలు చేయాలని మంత్రులు, అధికారుల చుట్టూ ప్రదక్షణాలు చేస్తున్న కనికరించడం లేదని ఆవేదన వ్యక్తం చేశారు. చదువుకున్న వీఆర్ఏలు ఎప్పటికైనా వీఆర్వో ప్రమోషన్ వస్తుందని ఆశగా ఎదురు చూస్తున్నారని, ప్రభుత్వం మాత్రం ప్రమోషన్లు ఇవ్వకుండా నిర్లక్ష్యం వహిస్తుందన్నారు. నామినీలుగా గా పని చేస్తున్న వారిని వీఆర్ఏలుగా గుర్తించడం లేదని, ప్రమోషన్ల కోసం ఎదురుచూస్తున్న వీఆర్ఏలకు వయోభారం పెరుగుతుందని చెప్పారు. దళిత, గిరిజన, మైనార్టీ, బడుగు, బలహీన వర్గాలకు వీఆర్ఏల కుటుంబాలను ఆకలి బాధల నుంచి ఆదుకోవాలని రాష్ట్ర ప్రభుత్వానికి విజ్ఞప్తి చేశారు. పెరిగిన ధరలకు అనుకూలంగా వీఆర్ఏలకు పేస్కేలు అమలు చేయాలని, అటెండర్ నైట్ వాచ్మెన్ ప్రమోషన్ల శాతాన్ని 70 శాతం కు పెంచాలని, అక్రమ డ్యూటీలను రద్దుచేసి, అర్హులైన వీఆర్ఏలకు అటెండర్ నైట్ వాచ్మెన్ గా ప్రమోషన్లు ఇవ్వాలని కోరారు. కార్యక్రమంలో జిల్లా కోశాధికారి అశోక్, వర్కింగ్ ప్రెసిడెంట్ రమణ, శివ, వెంకటసుబ్బయ్య పాల్గొన్నారు.