పుస్తకాన్ని ఆవిష్కరిస్తున్న వెంకటేశ్వర్లు
యుటిఎఫ్‌ రాష్ట్ర అధ్యక్షులు ఎన్‌.వెంకటేశ్వర్లు
ప్రజాశక్తి – శ్రీకాకుళం అర్బన్‌
సమాజ అభివృద్ధిలో ప్రశ్న కీలకమైందని యుటిఎఫ్‌ రాష్ట్ర అధ్యక్షులు ఎన్‌.వెంకటేశ్వర్లు అన్నారు. యుటిఎఫ్‌ మాజీ రాష్ట్ర కార్యవర్గ సభ్యులు కీ.శే కె.రామలక్ష్మి 6వ సంస్మరణ సభను ఆ సంఘ జిల్లా కార్యాలయంలో ఆదివారం నిర్వహించారు. ఈ సందర్భంగా యుటిఎఫ్‌ జిల్లా అధ్యక్షులు ఎల్‌.బాబురావు అధ్యక్షతన ‘చైతన్యం’ అనే అంశంపై నిర్వహించిన సదస్సులో ఆయన మాట్లాడారు. ప్రశ్నించడం, చైతన్యవంతంగా ఆలోచించడం మనిషి సహజమైన లక్షణమని, దాన్ని కోల్పోకుండా నిరంతరం కొనసాగించడం ద్వారానే సమాజంలో ఆవిష్కరణలు, శాస్త్రీయ దృక్పథాలు, ఉత్పత్తులతో సమాజ అభివృద్ధి జరిగిందన్నారు. వ్యక్తిగత చైతన్యం సంఘ చైతన్యంగా మార్చుకోవాలని, సంఘ చైతన్యం సామాజిక చైతన్యంగా అభివృద్ధి చేసుకోవడం ద్వారా వర్గ చైతన్యాన్ని అలవర్చుకోవాలని సూచించారు. శ్వాస మీద ధ్యాస ఉంచే వాళ్ళ కంటే, శ్రమ మీద ధ్యాస ఉంచే వారి సంఖ్య పెరగాలని, అదే సమాజానికి ఉపయోగమని తెలిపారు.. రుగ్మతలు లేని సమాజం కోసం అందరం కృషి చేయడమే రామలక్ష్మికి ఇచ్చే ఘన నివాళి అని అన్నారు.ఉత్తరాంధ్ర అభివృద్ధి వేదిక ప్రధాన కార్యదర్శి ఎ.అజశర్మ మాట్లాడుతూ స్వాతంత్య్ర ఉద్యమ కాలంలో ఆదర్శ భావాలు వెలసిల్లాయని, ఆ సందర్భంలోనే ఆదర్శ వివాహాలు, భావాలు ఏర్పడ్డాయని తెలిపారు. ప్రపంచీకరణ నేపథ్యంలో మతోన్మాద శక్తులు అశాస్త్రీయమైన అంశాల్ని సమాజంలోకి చొప్పించే ప్రయత్నం చేస్తున్నారని విమర్శించారు. అభ్యుదయ భావాలను తిరిగి అభివృద్ధి చేసే ప్రయత్నం చేయాలన్నారు. పురుషాధిక్యత, కుల, మత ఉన్మాదాలు నేటి సమాజంలో అంగీకరిస్తామా? సనాతన ధర్మాన్ని వ్యతిరేకిస్తామా? అని ప్రశ్నించుకోవాల్సిన సమయం అసన్నమైందన్నారు. యుటిఎఫ్‌ రాష్ట్ర కార్యదర్శి ఎస్‌.కిషోర్‌ కుమార్‌, జిల్లా ప్రధాన కార్యదర్శి బి.శ్రీరామ్మూర్తి, కార్యవర్గ సభ్యులు చౌదరి రవీంద్ర మాట్లాడుతూ రామలక్ష్మిని ఆదర్శంగా తీసుకొని ప్రభుత్వ విద్యను కాపాడుకోవాలని, ప్రభుత్వ పాఠశాలలకు వచ్చే పిల్లలకు నాణ్యమైన విద్య అందించడానికి కృషి చేయాలన్నారు. రామలక్ష్మి భర్త, విశ్రాంత డిప్యూటీ డిఇఒ కొత్తకోట అప్పారావు మాట్లాడుతూ రామలక్ష్మి ఆశయాలను ముందుకు తీసుకెళ్లడానికి కృషి చేస్తున్నామన్నారు. అనంతరం రామలక్ష్మి రాసిన ‘నేనొక కవిత్వం’ పుస్తకాన్ని ప్రముఖ రచయిత, కేంద్ర సాహిత్య అకాడమీ సలహా మండలి సభ్యులు ఎ.అప్పలనాయుడు ఆవిష్కరించారు. కవి, కథా రచయిత చింతాడ తిరుపతిరావు పుస్తకంపై సమీక్ష చేశారు. సభలో సిక్కోలు ట్రస్టు ప్రతినిధి డి.రవికుమార్‌, సాహితీ స్రవంతి కన్వీనర్‌ శ్రీనివాసు, రచయితలు సిద్ధార్థ, రామారావు, గర్ల్స్‌ హైస్కూల్‌ హెచ్‌ఎం వాగ్దేవి, యుటిఎఫ్‌ జిల్లా సహాధ్యక్షులు బి.ధనలక్ష్మి, గౌరవాధ్యక్షులు కె.వైకుంఠరావు పాల్గొన్నారు.
;