ప్రజాశక్తి- తిరుపతి(మంగళం) : తిరుపతి జిల్లా మంగళం పరిధిలోని తిరుమలనగర్‌ గ్రామపంచాయతీలో నిర్మాణంలో ఉన్న భవనం ఐదో అంతస్తు నుంచి పడి ముగ్గురు భవన నిర్మాణ కార్మికులు దుర్మరణం చెందారు. తుడా క్వార్టర్స్‌లోని హెచ్‌ఐజి ఫ్లాట్‌ నెంబర్‌ 63లో ఈ ఘటన మంగళవారం చోటుచేసుకుంది. ఈ భవనాన్ని రిటైర్డ్‌ టీచర్‌ కడివేటి అండాలయ్య నిర్మిస్తున్నారు. భవన నిర్మాణం కోసం తిరుపతి పట్టణాభివద్ధి సంస్థ నుండి జి ప్లస్‌ 3 అనుమతి తీసుకొని జి ప్లస్‌ 5 అంతస్తులు నిర్మిస్తున్నారు. ఐదో అంతస్తులో పడమటి వైపు పూతపని చేయడానికి నలుగురు మేస్త్రీలు సిమెంటు కలవతో పైకి వెళ్లారు. వీరు పైకి వెళ్లడానికి వీలుగా కర్రలతో ఏర్పాటు చేసుకున్న ‘సారవ’ నుంచి ఓ కర్ర జారిపోవడంతో పైనుంచి ఒక్కసారిగా కింద పడిపోయి తిరుపతికి చెందిన బోటతొట్టి శ్రీనివాసులు (38), ఒంగోలు జిల్లా ఆకర్లపూడి గ్రామానికి చెందిన బావమరుదులు తన్నీరు వసంత్‌ (40), కె.శ్రీనివాసులు (38) అక్కడికక్కడే మృతి చెందారు.
