నందమూరి హరికృష్ణ మనవడు, జానకిరామ్‌ కుమారుడు.. తారక రామారావు హీరోగా వై.వి.ఎస్‌.చౌదరి కొత్త సినిమాను తెరకెక్కించనున్న విషయం తెలిసిందే. ‘న్యూ టాలెంట్‌ రోర్స్‌’ పతాకంపై ఆయన సతీమణి గీత ఈ చిత్రాన్ని నిర్మిస్తున్నారు. ఈ చిత్రానికి కీరవాణి సంగీతం అందించనున్నారు. ఈ చిత్రంలో ఎన్టీఆర్‌ సరసన వీణారావు నటిస్తున్నారు. ఆమెను పరిచయం చేసేందుకు వై.వి.ఎస్‌.చౌదరి శనివారం మీడియా సమావేశాన్ని నిర్వహించారు. వీణారావు కూచిపూడి డ్యాన్సర్‌ అని, అచ్చతెలుగు అమ్మాయి అని తెలిపారు. సుప్రియ, స్వప్నదత్‌ వీణారావును పరిచయం చేశారు. ఈ సందర్భంగా నిర్మాత సుప్రియ మాట్లాడుతూ.. ‘వైవీఎస్‌ చౌదరి కొత్తవారిని పరిచయం చేయడంలో ముందుంటారు. తన కెరీర్‌లో ఎంతోమంది కొత్తవారిని ఇండిస్టీకి పరిచయం చేశారు. వీణారావు ఎన్నో సినిమాలు చేయాలని కోరుకుంటున్నా’ అన్నారు. తెలుగు అమ్మాయిలు ఇండిస్టీలోకి రావాల్సిన సమయమిదని మరో నిర్మాత స్వప్నదత్‌ అన్నారు. విజయవాడ అమ్మాయి హీరోయిన్‌గా రావడం ఎంతో ఆనందంగా ఉందన్నారు. సీనియర్‌ ఎన్టీఆర్‌ నటించిన ‘యుగంధర్‌’ సినిమా 1979 నవంబర్‌ 30న రిలీజైందని.. అందుకే ఈ రోజున వీణారావును పరిచయం చేయాలనుకున్నట్లు వైవీఎస్‌ చౌదరి తెలిపారు.
తాజా వార్తలు
