అమరావతి : పవర్స్టార్ పవన్ కల్యాణ్ హీరోగా జ్యోతి కృష్ణ దర్శకత్వంలో వస్తున్న ‘హరిహర వీరమల్లు’ సినిమా నుంచి సంక్రాంతి కానుకగా బిగ్ అప్డేట్ వచ్చింది. ఈ మూవీలోని ఫస్ట్ సింగిల్ ‘మాట వినాలి’ అంటూ సాగే పాట ప్రోమోను తాజాగా మేకర్స్ విడుదల చేశారు. కాగా, ఈ పాటను స్వయంగా పవన్ ఆలపించారు. తాజాగా విడుదలైన ప్రోమోలో వీరమల్లు మాట వినాలి.. అంటూ పవన్ గొంతు అభిమానుల్లో జోష్ నింపుతోంది. ఈ పాటను ఈ నెల 6న విడుదల చేస్తామని గతంలో మేకర్స్ ప్రకటించారు. కానీ, వాయిదా పడింది. మళ్లీ ఇప్పుడు సాంగ్ ప్రోమోను రిలీజ్ చేసి, పూర్తి పాటను ఈ నెల 17న రిలీజ్ చేస్తున్నట్లు ప్రకటించారు. ఇక గతంలో నాలుగైదు చిత్రాల్లో పాటలు పాడిన పవన్ మళ్లీ చాలా గ్యాప్ తర్వాత ఈ సినిమాలో పాట పాడుతుండడంతో ఫ్యాన్స్ ఫుల్ ఖుషీ అవుతున్నారు. ఇక ఆస్కార్ అవార్డు విజేత ఎంఎం కీరవాణి బాణీలు అందిస్తున్న ఈ మూవీని మార్చి 28న రిలీజ్ చేయనున్నట్టు ఇప్పటికే చిత్ర బృందం ప్రకటించింది. పవన్ సరసన హీరోయిన్గా నిధి అగర్వాల్ నటిస్తున్నారు.
