కన్నడ : ప్రముఖ సెలబ్రిటీ రియాల్టీ షో బిగ్‌బాస్‌ పలు రాష్ట్రాల్లో విజయవంతంగా ప్రసారం అవుతున్న సంగతి విదితమే. గత 11 సీజన్లుగా కన్నడ బిగ్‌ బాస్‌ షో కు ప్రముఖ స్టార్‌ హీరో సుదీప్‌ హోస్ట్‌ గా వ్యవహరిస్తున్నారు. అయితే వచ్చే సీజన్‌ నుండి తాను హోస్ట్‌ గా పనిచేయబోనని ఇటీవల ఓ ఇంటర్వ్యూలో ప్రకటించారు. రానున్న గ్రాండ్‌ ఫినాలే తర్వాత తాను బిగ్‌ బాస్‌ షో కార్యక్రమంలో వ్యాఖ్యాతగా కనిపించనని పేర్కొంటూ తాజాగా ఎక్స్‌ వేదికగా పోస్ట్‌ పెట్టారు.
‘ ‘దాదాపు 11 సీజన్ల నుంచి నేను ఎంతగానో ఎంజాయ్ చేసిన కార్యక్రమం బిగ్‌బాస్‌. హోస్ట్‌గా నాపై విశేషమైన ప్రేమాభిమానాన్ని చూపించినందుకు ప్రతి ఒక్కరికీ ధన్యవాదాలు. త్వరలో జరగనున్న ఫినాలేతో హోస్ట్‌గా నా ప్రయాణం ముగుస్తోంది. వ్యాఖ్యాతగా నేను మీ అందరికీ వినోదాన్ని మెండుగా అందించాననే భావిస్తున్నా. ఇది ఎప్పటికీ మర్చిపోలేని ప్రయాణం. నాకు సాధ్యమైనంతవరకూ ఉన్నతంగా దీనిని కొనసాగించా. నాకు ఈ అవకాశాన్ని ఇచ్చిన వారికి ధన్యవాదాలు ” అని సుదీప్‌ పోస్టులో రాసుకొచ్చారు. ఇదే విషయాన్ని ఆయన ఇటీవల ఓ ఇంటర్వ్యూలోనూ తెలిపారు. అంతర్గతంగా జరిగిన కొన్ని ఇబ్బందుల వల్లే తాను ఈ నిర్ణయం తీసుకున్నట్లు చెప్పారు. ” అంతర్గతంగా జరిగిన కొన్ని లోటుపాట్లు కూడా ఈ నిర్ణయం తీసుకోవడానికి కారణం. నా శ్రమకు తగిన గుర్తింపు రాలేదనిపించింది. మిగిలిన భాషల్లో బిగ్‌బాస్‌ కార్యక్రమానికి వచ్చినంత గుర్తింపు కన్నడ షోకు రాలేదు. మిగిలిన షోలతో మా షోను పోల్చి చూస్తే మా కార్యక్రమానికి మరింత గౌరవం, గుర్తింపు రావాలి. అలాంటి గుర్తింపు లేనప్పుడు దీనికోసం కేటాయించే సమయాన్ని సినిమాలపై పెడితే బాగుంటుందని నా ఫీలింగ్‌. అందుకే హోస్టింగ్‌కు గుడ్‌బై చెప్పాలని నిర్ణయించుకున్నా ” అని సుదీప్‌ ఆ ఇంటర్వ్యూలో చెప్పారు. అయితే ప్రస్తుతం ప్రసారం అవుతోన్న కన్నడ 11వ సీజన్‌ జనవరి 26తో ముగియనుంది.
తాజా వార్తలు
