వాతావరణంలో అనేక రకాలైన సూక్ష్మ క్రిముల మధ్య మనం జీవిస్తున్నాం. ఈ బ్యాక్టీరియా, వైరస్, ఫంగై, పారసైట్ క్రిముల్లో కొన్ని మాత్రమే మనకు జబ్బులు కలుగజేస్తుంటాయి. ఫ్లూ, జలుబు తరహా అస్వస్థతని కలుగజేసే వైరస్లు అనేకం ఉన్నాయి. చాలా సందర్భాల్లో వివిధ రకాల ఇన్ఫెక్షన్లు ఏ విధమైన లక్షణాలు చూపకుండానే మన శరీరం అదుపు చేస్తుంది. దాదాపు అన్ని సాంక్రమిక వ్యాధులు, ఇన్ఫెక్షన్స్, వివిధ అనారోగ్యాలు, దీర్ఘకాలిక అనారోగ్యాలు ఉన్నవారిలోనూ, వృద్ధుల్లోనూ, ఇంకా కొన్నయితే పిల్లల్లోనూ తీవ్రమైన ప్రభావాన్ని చూపిస్తాయి. జలుబు లేదా ఫ్లూ కూడా దీనికి మినహాయింపు కాదు. మిగతా అన్ని ఫ్లూలకు తీసుకునే జాగ్రత్తలనే ‘హ్యూమన్ మెటాన్యూమో’ వైరస్ విషయంలో కూడా తీసుకోవాలి.
రోగనిరోధక శక్తిలేనివారిపై తీవ్ర ప్రభావం
‘హ్యూమన్ మెటాన్యూమోవైరస్ (హెచ్ఎంపివి)ను 2001లో నెదర్లాండ్స్లో గుర్తించారు. ప్రస్తుతం ఇది చైనాలో వ్యాపిస్తోందని చర్చ జరుగుతోంది. ఇది కొత్తగా గుర్తించిన వైరసైనా వేర్వేరు జబ్బులు అధ్యయనం కోసం భద్రపర్చిన 50 ఏళ్లనాటి రక్త నమూనాల్లో దీనికి సంబంధించిన యాంటీ బాడీస్ ఆనవాళ్లను గుర్తించారు. తర్వాత కాలంలో ప్రపంచవ్యాప్తంగా ఈ వైరస్ ఇన్ఫెక్షన్లను గుర్తిస్తూనే ఉన్నారు. టర్కీ కోళ్లల్లో ఇన్ఫెక్షన్ కలగజేసే ఎవిఎన్ మెటాన్యూమోవైరస్ (ఎఎంపివి)తో దగ్గరి పరిణామ సంబంధాన్ని కలిగివుంది. హెచ్ఎంపివి అనారోగ్యం మాత్రం రెస్పిరేటరీ సిన్సిషియల్ వైరస్ (ఆర్ఎస్వి) ఫ్లూని పోలివుంటుంది.
హెచ్ఎంపివి తీవ్ర ప్రభావం
హెచ్ఎంపివి ప్రపంచవ్యాప్తంగా అన్ని వయసుల వారికి సోకుతుంది. చిన్నపిల్లలు, వద్ధులు, రోగనిరోధక శక్తి లేని వ్యక్తుల్లో మాత్రం తీవ్రమైన ప్రభావాన్ని చూపుతుంది. హెచ్ఎంపివి ఇన్ఫెక్షన్లు ప్రపంచవ్యాప్తంగా ప్రబలంగా ఉన్నాయి. ఇవి శ్వాసకోశ వ్యాధులకు గణనీయంగా దోహదం చేస్తాయి. పిల్లలు ఐదు సంవత్సరాల వయస్సులోపు హెచ్ఎంపివి బారిన పడ్డారని అధ్యయనాలు అంచనా వేస్తున్నాయి.
వైరస్లతో అతివ్యాప్తి
హెచ్ఎంపివి ఇన్ఫెక్షన్ క్లినికల్ ప్రెజెంటేషన్ తరచుగా ఇతర శ్వాసకోశ వైరస్లతో అతివ్యాప్తి చెందుతుంది. రోగ నిర్ధారణ కేవలం లక్షణాల ఆధారంగా మాత్రమే సవాల్గా మారుతుంది. పాలిమరేస్ చైన్ రియాక్షన్ (పిసిఆర్), సెరోలాజికల్ అస్సేస్ వంటి ప్రయోగశాల పరీక్షలు హెచ్ఎంపివి ఇన్ఫెక్షన్ను నిర్ధారించడానికి చాలా ముఖ్యమైనవి. ఈ పరీక్షలు హెచ్ఎంపివి, ‘ఇన్ఫ్లుయెంజా, ఆర్ఎస్వి, రైనోవైరస్ల వంటి ఇతర సాధారణ శ్వాసకోశ వైరస్ల నుండి వేరు చేయడానికి సహాయపడతాయి. తగిన నిర్వహణ, సంక్రమణ నియంత్రణ చర్యలను అనుమతిస్తుంది.
ప్రస్తుతం హెచ్ఎంపివికి నిర్దిష్ట యాంటీవైరల్ చికిత్సలు లేదా టీకాలు అందుబాటులో లేవు. నిర్వహణ ప్రధానంగా హైడ్రేషన్, జ్వరం నియంత్రణ, అవసరమైతే ఆక్సిజన్ థెరపీతో సంరక్షణకు చర్యలు తీసుకుంటున్నారు. ప్రభావవంతమైన యాంటీవైరల్ చికిత్సలు, టీకాలను అభివృద్ధి చేయడానికి పరిశోధనలు కొనసాగుతున్నాయి. అనేక ఆశాజనక వ్యాక్సిన్లు పరిశోధనల్లో ఉన్నాయి. లైవ్ అటెన్యూయేటెడ్ వైరస్లు, సబ్యూనిట్ టీకాలు, ఎంఆర్ఎన్ఎ టెక్నాలజీ వంటి వివిధ వ్యూహాలను ఉపయోగిస్తున్నారు.
శ్వాసకోశ వైరస్
హెచ్ఎంపివి ప్రపంచవ్యాప్తంగా ప్రబలంగా ఉన్న శ్వాసకోశ వైరస్. ఇది ఒక ముఖ్యమైన ప్రజారోగ్య సమస్యగా ఉద్భవించింది. ఇటీవల కనుగొనబడినప్పటికీ, సెరోలాజికల్ ఆధారాలు ఇది దశాబ్దాలుగా మానవుల్లో వ్యాపిస్తోంది. ఈ వైరస్ తేలికపాటి జలుబు నుండి తీవ్రమైన న్యుమోనియా వరకు ప్రపంచవ్యాప్తంగా విస్తృత శ్రేణి శ్వాసకోశ వ్యాధులకు కారణమవుతోంది. ప్రస్తుతం, నిర్ధిష్ట చికిత్సలు లేదా టీకాలు అందుబాటులో లేవు. అయినా పరిశోధనలు కొనసాగుతున్నాయి.
వ్యాక్సిన్ అందుబాటులో లేదు
ప్రస్తుతానికి ఈ హ్యూమన్ మెటాన్యూమో వైరస్కి నిర్ధిష్టమైన యాంటీ వైరల్ మందులు లేవు. ఇంకా వ్యాక్సిన్ కూడా రూపొందించాల్సి ఉంది. కాగా ఈ క్రిమి, వైరస్ సోకిన వారికి ఎదురయ్యే ఇతర ఇబ్బందులను సమర్ధవంతంగా చికిత్స చేయడం ద్వారా మిగతా అన్ని జలుబుల నుండి బయటపడినట్లుగానే దీని నుంచి కూడా బయటపడొచ్చు. ప్రస్తుతం ఈ వైరస్ జనంలోకి చొచ్చుకుపోయి ప్రపంచ పీడగా మారగల జన్యుపరమైన మార్పులేవీ చోటు చేసుకోలేదు. దీని మీద జరుగుతున్న చర్చ అత్యుత్సాహం తప్ప మరోటి కాదు.
ఇవీ, లక్షణాలు
- దగ్గు, ముక్కు కారటం, గొంతు నొప్పి, జ్వరం
- తేలికపాటి నుంచి మితమైన శ్వాసకోశ లక్షణాలు
- చిన్నపిల్లలు, వృద్ధులపై ప్రభావం
- డయాబెటీస్, ఆస్త్మా, హెచ్ఐవీ, దీర్ఘకాలిక వ్యాధులున్న వారికి ఇబ్బందులు
- రోగనిరోధక వ్యవస్థ తగిన స్థాయిలో పనిచేయని వారు
- ముక్కు, గొంతుకే పరిమితం కాకుండా కిందికి ఊపిరితిత్తుల్లోకి వ్యాప్తి
- ఇలాంటి వారికి బ్రోంకియోలైటిస్, న్యుమోనియా, శ్వాసకోశ వైఫల్యం వంటి తీవ్రమైన సమస్యలు
ఫ్లూ సిండ్రోమ్లలో హెచ్ఎంపివి ప్రాబల్యం సీజన్, భౌగోళిక స్థానం, అధ్యయనం చేయబడిన జనాభాను బట్టి మారుతుంది. ఆసుపత్రిలో చేరిన పిల్లల్లో 5 నుంచి 10 శాతం శ్వాసకోశ వ్యాధులకు ప్రారంభంలో ఇన్ఫ్లుÛయెంజాగా నిర్ధారణైన కేసుల్లో గణనీయమైన నిష్పత్తికి హెచ్ఎంపివి కారణమవుతుందని అధ్యయనాలు చెబుతున్నాయి.
– డాక్టర్ యనమదల మురళీకృష్ణ, ఎండి,
సాంక్రమిక వ్యాధుల నిపుణులు,
కాకినాడ. సెల్ : 9440677734
