పల్లె రైతు యొకడు పాడిపసుల పెంచి
పాలనమ్ముచుండె పట్నమందు
పాల చిక్కదనము వ్యాపారమును పెంచ
మంచిపేరు వచ్చె సంచితముగ
మిగులు పాలగాచి పెరుగు మిన్న చిలికి
వెన్నకాచి నేతి ఘటము పేర్మి కూర్చి
పట్నమందున అమ్మగా ప్రజలు మెచ్చె
చేయు వ్యాపారమున చాల చేయి తిరిగె
నేతి వ్యాపారమందున నీతి తోడ
రుచియు నాణ్యతలెన్నగా శుచికి తోడ
ధనము కీర్తి కూడెను చాల త్వరితముగను
శ్రద్ధయున్న చోట పెరుగు సంపదెపుడు
ఒక్కనాడు రైతు ఊరికి బోవగా
పనుల నప్పజెప్పె భార్యకపుడు
వెన్న తీయుటయన వేగిర పడుమనె
మోసగించకనెను ముక్కబెట్టి …
సేవకులకు నీవు చెప్పరాదు పనులు
నేతి కాచుటంత నీవె చేయు
తప్పు జరిగినాక తప్పించుకోలేము
శ్రద్ధ చూపుమనుచు సుద్దు జెప్పె
భర్త వెడలిపోయె పరదేశము పనుల
భార్య విడిచిపెట్టె బంటులకును
పాలు తీసి కాచి వేళకు తోడేసి
పెరుగు చిలుకు పనులు విసుగు చేత
మూడురోజులు మీగడ మురగబెట్టి
ఆరు దినముల వెన్నల నంట గాచి
తీరుబడిగ చేయ దొడగు వీరి పనుల
కంపుగొట్టె నేతి సరుకు కడవలందు
మేలుగూర్చెడి కార్యమందున
మిక్కటించెను నష్టముల్‌
కాలయాపన చేసికొన్నను
కాలదన్నును సౌఖ్యముల్‌
ఎప్పటి కప్పుడు పనులను
తప్పనిసరి చేయుచుండ తడబాటవకన్‌
తప్పించునననుకూలత
తప్పును చీవాట్లు తొలగు దారిద్య్రమ్ముల్‌
ఆలసించిన మించును కాలవశము
ఆలసించిన అమృతమ్మె ఔను విషము
ఆలసించ నశించును చాల నిజము
ఆలసించకు పనులను అహరహమును
– నాగమంజరి గుమ్మా
99856 67500.
