Nov 21,2020 06:44

'వృత్తి పరమైన పని పరిస్థితులు, భద్రత, ఆరోగ్యం కోడ్‌' నిబంధనల ప్రకారం యజమానులకు కేంద్ర, రాష్ట్ర ప్రభుత్వాలు మినహాయింపులు ఇచ్చే అధికారం వచ్చింది. ఈ కోడ్‌ లోని 127, 128 సెక్షన్లు కార్మికులకు ప్రమాదకరమైనవి. యజమానులకు ఆహ్లాదాన్ని అందించేవి. ఇంతకు ముందు ఉన్న ఫ్యాక్టరీల చట్టం ఈ కోడ్‌లో విలీనమైంది. అది ఫ్యాక్టరీలకే వర్తిస్తే, ఈ కోడ్‌ అన్ని ఫ్యాక్టరీలతో పాటు సంస్థలు, షాపులకు కూడా వర్తిస్తుంది. 8 గంటల పని, వారాంతపు సెలవులు, ఓటీ, వేతనంతో కూడిన సెలవులు తదితర పని పరిస్థితుల హక్కులు, కార్మిక సంఘాల పోరాట కారణంగా కోడ్‌ ప్రధాన భాగంలో వచ్చాయి. భద్రత, ఆరోగ్యానికి సంబంధించి యజమానులు తీసుకోవాల్సిన చర్యలు నిబంధనల్లో రానున్నాయి. ఫ్యాక్టరీ చట్టం లేదా ఎ.పి.షాప్స్‌ అండ్‌ ఎస్టాబ్లిష్‌మెంట్స్‌ చట్టాల్లో నిబంధనల (హక్కులు) అమలు నుండి యజమానులకు సాధారణ మినహాయింపు ఇచ్చే అధికారం కేంద్ర, రాష్ట్ర ప్రభుత్వాలకు లేదు.ఇప్పుడు కొత్తగా నిబంధనల అమలు నుండి నోటిఫికేషన్‌ ద్వారా సాధారణ మినహాయింపు ఇచ్చే అధికారం కేంద్ర, రాష్ట్ర ప్రభుత్వాలకు 127(1) సెక్షన్‌ ఇచ్చింది. ప్రభుత్వాలు భావించినంత కాలం ఈ మినహాయింపు ఇవ్వవచ్చు. అన్ని పని ప్రదేశాలకు వర్తిస్తుంది.


కార్మికులకు ప్రమాదకరమైన మరో సెక్షన్‌ 127(2). దీని ప్రకారం కొత్త ఫ్యాక్టరీల్లో ఉత్పత్తి ప్రారంభమైన దగ్గర నుండి రాష్ట్ర ప్రభుత్వాలు తాము భావించినంత కాలం, ఈ నిబంధనల్లో వేటి నుండయినా లేదా అన్నిటి నుండీ మినహాయింపు ఇవ్వవచ్చు. ప్రజా ప్రయోజనం పేరుతో కార్మికుల నోట్లో మట్టి కొట్టొచ్చు. ఏ రాష్ట్రంలో ఎక్కువ మినహాయింపులు ఉంటే ఆ రాష్ట్రానికి పెట్టుబడులు తరలి పోతాయి. మినహాయింపులు ఇవ్వటంలో రాష్ట్రాల మధ్య పోటీ పెరుగుతుంది. ఈ పోటీకి అర్ధం - ఎటువంటి హక్కులు లేకుండా చేసి కార్మికులను పెట్టుబడిదార్లకు బానిసలుగా అప్పజెప్పటంలో పోటీ పడటమే.


సెక్షన్‌ 128 కూడా కేంద్ర, రాష్ట్ర ప్రభుత్వాలకు విస్తృత అధికారాలు ఇచ్చింది. ఫ్యాక్టరీల చట్టం ఉన్నప్పుడు పబ్లిక్‌ ఎమర్జెన్సీ (ప్రజా అత్యవసర పరిస్థితి) లో మాత్రమే ఫ్యాక్టరీ యజమానులకు ఈ నిబంధనల అమలు నుండి మినహాయింపు ఇచ్చే అధికారం రాష్ట్ర ప్రభుత్వాలకు ఉంది. యుద్ధం లేదా విదేశీ దురాక్రమణ లేదా అంతర్గతంగా అల్లర్ల వలన దేశంలో గాని, దేశం లోని ఒక ప్రాంతానికి గాని భద్రతాపరమైన ప్రమాదం రావడాన్ని పబ్లిక్‌ ఎమర్జెన్సీగా నిర్వచించారు. దీనికి విరుద్ధంగా బిజెపి రాష్ట్ర ప్రభుత్వాలు కరోనా సమయంలో పని గంటలు పెంచుతూ ఇచ్చిన నోటిఫికేషన్లన్నీ చట్ట విరుద్ధమైనవే. గుజరాత్‌ ప్రభుత్వం ఇచ్చిన నోటిఫికేషన్‌ను గుజరాత్‌ హైకోర్టు కొట్టివేయడం దీనికి తార్కాణం.

పని పరిస్థితులు, భద్రత, ఆరోగ్యం కోడ్‌ లోని సెక్షన్‌ 128లో పబ్లిక్‌ ఎమర్జెన్సీతో పాటు మహమ్మారి జబ్బులు, విపత్తులను కూడా చేర్చారు. పబ్లిక్‌ ఎమర్జెన్సీకి ఫ్యాక్టరీల చట్టంలో ఉన్న నిర్వచనాన్నే ఇచ్చారు. కానీ మహమ్మారి జబ్బులకు, విపత్తులకు నిర్వచనాలు ఇవ్వలేదు. ఇవి పెద్ద ఎత్తున దుర్వినియోగం అవుతాయి. ఆ పేరుతో, ఈ పేరుతో యజమానులకు వీటన్నింటి నుండి మినహాయింపులు ఇస్తారు. ఈ మినహాయింపులను కేంద్ర, రాష్ట్ర ప్రభుత్వాలు తమ పరిధి లోని అన్ని పని ప్రదేశాలకు వర్తింపచేస్తాయి. ఫ్యాక్టరీల చట్టం ప్రకారం మినహా యింపులు 3 నెలలకే పరిమితమైతే, ఈ కోడ్‌లో ఒకేసారి ఒక సంవత్సరం వరకు మినహాయింపు ఇవ్వవచ్చు. సంవత్సరం పూర్తయిన తర్వాత మరలా పొడిగించవచ్చు.

పారిశ్రామిక సంబంధాల కోడ్‌లోని సెక్షన్‌ 77(1) ప్రకారం 300 లేదా సంబంధిత ప్రభుత్వాలు నోటిఫికేషన్‌లో పేర్కొన్న అంత కంటే ఎక్కువ సంఖ్యలో కార్మికులు వున్న సంస్థలు మాత్రమే మూసి వేతలకు, కార్మికుల తొలగింపులకు, లేఆఫ్‌లకు ప్రభుత్వ అనుమతి తీసుకోవాలి. ఈ సెక్షన్‌ కూడా రాష్ట్రాల మధ్య పోటీని పెంచుతుంది. కార్మికుల సంఖ్యను 300 నుంచి 500 లకు లేదా వెయ్యికి లేదా ఎంతకైనా పెంచే అధికారం రాష్ట్ర ప్రభుత్వాలకు వస్తుంది. కార్మికులను తొలగించే అధికారం ఉన్న రాష్ట్రాలకే పెట్టుబడిదారులు క్యూ కడతారు. పని పరిస్థితులు, భద్రత, ఆరోగ్యం కోడ్‌ లోని సెక్షన్‌ 77(1), పారిశ్రామిక సంబంధాల కోడ్‌లోని సెక్షన్లు 127(1), 127(2), 128 అన్నీ కలసి పిల్లికి చెలగాటం, ఎలుకకు ప్రాణ సంకటంగా మారుస్తాయి. ఇందులో పెట్టుబడిదారులు పిల్లులు. కార్మికులు ఎలుకలు.
                                                                        * పి. అజయ కుమార్‌ (సిఐటియు రాష్ట్ర ఉపాధ్యక్షులు)