మార్వెల్‌, డీసీ సినిమాలు చూసి చూసీ మనకూ ఓ సూపర్‌ హీరో ఉండి, అతనిపై కూడా సినిమా వస్తే బాగుండు అని ప్రతి ఒక్కరూ అనుకునే ఉంటారు. అలా అనుకున్న వాళ్లందరికీ దొరికిన సమాధానమే 'మిన్నల్‌ మురళి'. అయితే మన నేటివిటీకి తగ్గట్టుగా క్రిష్‌ తప్ప ఇంతవరకూ సరైన సూపర్‌ హీరో సినిమా ఒక్కటి కూడా లేదు. ప్రస్తుతం మలయాళ ఇండిస్టీ రూపొందించిన ఈ ఇండియన్‌ సూపర్‌ హీరో ఫిలిమ్‌ టైటిల్‌ దగ్గర నుంచి ట్రైలర్‌ వరకూ అన్నీ విశేషంగా ఆకట్టుకున్నాయి. థియేటర్లలో విడుదలవ్వడానికి ప్రయత్నించినప్పటికీ.. కరోనా కారణంగా నెట్‌ ఫ్లిక్స్‌లో విడుదలైంది. తెలుగు సహా మొత్తం ఐదు భాషల్లో ఈ సినిమా అందుబాటులో ఉంది. మరి మిన్నల్‌ మురళి మెప్పించాడా? ఈ సూపర్‌ హీరో సినిమా ఎలా ఉందో చూద్దాం..!
చిత్రం : మిన్నల్‌ మురళి
నటీనటులు : టొవినో థామస్‌, గురు సోమసుందరం, అజు వర్గీస్‌, సాజన్‌ తదితరులు
సంగీతం : సుశీన్‌ శ్యామ్‌, షాన్‌ రెహమాన్‌
సినిమాటోగ్రఫీ: సమీర్‌ తాహిర్‌
ఎడిటింగ్‌ : లివింగ్‌స్టోన్‌ మాథ్యూ
రచన : అరుణ్‌ అనిరుధన్‌, జస్టిస్‌ మాథ్యూ
దర్శకత్వం : బాసిల్‌ జోసెఫ్‌
ఓటీటీ : నెట్‌ఫ్లిక్స్‌
కథలోకి వెళ్తే... జేసన్‌ (టొవినో థామస్‌) ఉరవకొండలో ఒక టైలర్‌ షాప్‌ పెట్టుకుని జీవనం సాగిస్తూ ఉంటాడు. ఎప్పటికైనా అమెరికా వెళ్లడానికి సన్నాహాలు చేసుకుంటూ ఉంటాడు. అయితే అదే ఊర్లో ఇన్‌స్పెక్టర్‌ కూతురిని ప్రేమిస్తాడు. కానీ తను జేసన్‌ని కాదని డబ్బున్న వ్యక్తిని పెళ్లి చేసుకుంటుంది. ఇక అదే ఊర్లో చిన్న కాకా హోటల్లో పనిచేసే షిబు (గురు సోమసుందరం) ది మరో కథ. తను మానసిక సమస్యతో బాధపడుతూ ఉంటాడు. చిన్నప్పటి నుంచి ప్రేమిస్తున్న ఉష (షెల్లీ కిషోర్‌) కోసం ఎదురుచూస్తూ ఉంటాడు. భర్త వదిలేసి, ఒక కూతురు ఉన్నప్పటికీ.. తననే పెళ్లి చేసుకోవాలని ఆశతో ఉంటాడు. కానీ తన సమస్యల కారణంగా ఎవరూ తనను లెక్క చేయరు. ఒకరోజు ఆ ఊరిలో ఒకేసారి జేసన్‌, షిబుల మీద పిడుగులు పడతాయి దీంతో. ఇద్దరికీ కొన్ని అతీతశక్తులు వస్తాయి. తమ శక్తులను వారు ఎలా ఉపయోగించారు? ఈ ఇద్దరి శక్తుల కారణంగా ఉరవకొండ ఎలాంటి ఇబ్బందులు పడింది? ఎవరు హీరో? ఎవరు విలన్‌? అందుకు ప్రేరేపించిన కారణాలు ఏమిటి? వారి జీవితాలు చివరికి ఏమయ్యాయి? అనేది 'మిన్నల్‌ మురళి' కథాంశం.
ముందుగా దర్శకుడు బసిల్‌ జోసెఫ్‌ను కచ్చితంగా మెచ్చుకుని తీరాల్సిందే. సూపర్‌ హీరో సినిమాలంటే కళ్లు చెదిరే యాక్షన్‌ సన్నివేశాలు ఉండాల్సిందేనన్న చట్రంలో నుంచి బయటకు వచ్చి ఎమోషన్‌, సస్పెన్స్‌తో కూడా ప్రేక్షకులను కనెక్ట్‌ చేయవచ్చని నిరూపించాడు. సినిమాలో కేవలం మూడు యాక్షన్‌ సీక్వెన్స్‌లే ఉన్నాయి. అందులో పెద్ద సీక్వెన్స్‌ అయితే క్లైమాక్స్‌ మాత్రమే. నేను బాగుంటే చాలు అనుకునే ఒక సాధారణ వ్యక్తి.. ఊరంతా బాగుండాలి అనే యాటిట్యూడ్‌ ఉన్న సూపర్‌ హీరోగా ఎలా మారాడన్న అంశాన్ని చాలా బాగా చూపించారు. ఈ కోణంలో చూస్తే మాత్రం మనదేశంలో ఇప్పటిదాకా వచ్చిన బెస్ట్‌ సూపర్‌ హీరో సినిమా ఇదే. ఇంత మంచి కంటెంట్‌ ఉన్న సినిమా ఓటీటీ కంటే థియేటర్లలో విడుదలై ఉంటే చాలా బాగుండేది. పెద్ద సక్సెస్‌ కూడా అయ్యేది. చిన్నపాటి పొరపాట్లు ఉన్నప్పటికీ.. కంటెంట్‌ వైజ్‌ మాత్రం మాంచి సినిమాటిక్‌ ఎక్స్‌పీరియన్స్‌ అందించే చిత్రమిది. నెట్‌ ఫ్లిక్స్‌లో స్ట్రీమ్‌ అవుతున్న ఈ సినిమాని ఒకసారి కచ్చితంగా చూడాల్సిందే.
ఒక సూపర్‌ హీరో ఎలివేట్‌ అవ్వాలంటే తన స్వభావానికి పూర్తి విరుద్ధమైన, అంతే బలమైన సూపర్‌ విలన్‌ కూడా ఉండాలి. షిబు పాత్రను సరిగ్గా జేసన్‌ పాత్రకు పూర్తి విరుద్ధంగా దర్శకుడు జోసెఫ్‌ మలిచాడు. తనకు కావాల్సింది దక్కడం కోసం ఊరిని నాశనం చేయడానికీ వెనుకాడని ఒక సూపర్‌ విలన్‌ పాత్రను జోసెఫ్‌ రాసుకున్నాడు. హీరో, విలన్‌ మధ్య జరిగే సన్నివేశాలు, వారిద్దరి మధ్య వచ్చే కాన్‌ఫ్లిక్ట్‌.. ఆడియన్స్‌ను చూపు తిప్పనివ్వకుండా చేస్తుంది. ఒకరి గురించి ఒకరికి తెలిసే సన్నివేశాలు కూడా చాలా గ్రిప్పింగ్‌గా, థ్రిల్లింగ్‌గా చూపించారు. క్లైమ్యాక్స్‌లో యాక్షన్‌ సీక్వెన్స్‌ కూడా అద్భుతంగా వచ్చింది.
ఇక నటీనటుల విషయానికి వస్తే.. జేసన్‌ పాత్రలో టొవినో థామస్‌, షిబు పాత్రలో గురు సోమసుందరం నటించారనడం కంటే జీవించారని చెప్పవచ్చు. రెండు పాత్రల్లోనూ చాలా షేడ్స్‌ ఉన్నాయి. ముఖ్యంగా ప్రీ-క్లైమాక్స్‌, క్లైమాక్స్‌లో గురు సోమసుందరం నటనతో కట్టిపడేస్తాడు. ఒక సాధారణ వ్యక్తి సూపర్‌ హీరోగా, ఒక మానసిక రోగి సూపర్‌ విలన్‌గా మారడానికి కారణమైన సన్నివేశాలు అంత పండాయంటే వీరి నటన కూడా కారణమే. ఇక టొవినో థామస్‌ మేనల్లుడిగా నటించిన బాల నటుడు వశిష్ట్‌ ఉమేష్‌, తనకు సాయం చేసే కరాటే టీచర్‌గా నటించిన ఫెమినా జార్జ్‌లు తమ పాత్రలకు న్యాయం చేశారు. సినిమాలో హీరో, విలన్‌ తర్వాత వీరివే ప్రధాన పాత్రలు. సమీర్‌ తాహిర్‌ సినిమాటోగ్రఫీ చాలా బాగుంది. సుచిన్‌ శ్యామ్‌, షాన్‌ రహమాన్‌ అందించిన పాటలు ఎప్పుడు వచ్చాయి, ఎప్పుడు వెళ్లాయో కూడా తెలియదు. ఎందుకంటే సినిమాలో అన్ని పాటలూ కథలో భాగంగా బ్యాక్‌గ్రౌండ్‌లోనే వస్తాయి. సుచిన్‌ శ్యామ్‌ నేపథ్య సంగీతం కూడా అద్భుతంగా అందించాడు. అయితే సినిమా ఎడిటింగ్‌ కొంచెం క్రిస్ప్‌గా ఉంటే బాగుండేది. నెమ్మదిగా సాగిన ప్రథమార్ధంలో కొంత నిడివి తగ్గేది. ఓవరాల్‌గా చెప్పాలంటే.. సూపర్‌ హీరో జోనర్‌ మీకు నచ్చితే మిన్నల్‌ మురళి కచ్చితంగా చూడాల్సిన సినిమాల్లో ఒకటి!
