మా పల్లె భారతి

తూరుపునుదయించే సూర్యుడి మల్లే
మా పల్లే భారతి
హరిత కిరణాల్ని మూటగట్టుకొని
గూడెం గుండెలొ కోడై కూస్తుంది
భళ్లున తెల్లవారంగనే
అడవుల్ని కప్పుకున్న చలి కౌగిళ్లు
గుడిసెల ముందు నెగళ్లతో
పారాహుషారవుతుంటే
కొడవళ్లు నాగళ్లు చేతబూని
పొలం వైపు నడిచింది
మా పల్లె భారతి
—–
సీమిడి ముక్కు సిగ్గుబిళ్లతో
వెక్కి వెక్కి ఏడుస్తున్న చిన్నదాన్ని
గట్టుపైదించి బండకింది ఎండ్రికాయని
ఆడుకొమ్మని యిచ్చింది
మా పల్లె భారతి
జిన్నెచెట్టు చిటారుకొమ్మనున్న
తేనె పట్టుకోసం
గోనె సంచుల్ని తొడిగింది
మా పల్లె భారతి
కొండపై నుంచి పల్లెవైపు వంగిన
ఇంధ్రధనుస్సును చూసి
పురివిప్పిన నెమలయ్యింది
మా పల్లె భారతి
—–
సంక్రాంతి పండక్కు సకినాలు చేసి
ముంగిళ్లనిండా ముగ్గుల్ని పరిచి
గొబ్బిళ్లపై పూల్‌ సిగ్గుల్నివంచి
రేలా పాటల్లో గాలి పటమై ఎగిరింది
మా పల్లె భారతి
డూ..డూ..బసవలు సందడి చేయంగ
హరిదాసు కీర్తనకు
సరిగమలు పలికింది
గుమ్మిలో ధాన్యము దండిగా లేకున్నా
కొత్త అల్లుడికి తీపి పొంగలయ్యింది
కళ్లల్లో కన్నీళ్లు తచ్చాడుతుంటే
భోగి మంటల తోటి కాంతుల్ని చిమ్మింది
కోటి ఆశల వేకువకు స్వాగతం పలికింది
మా పల్లె భారతి…!

– డా.కటుకోఝ్వల రమేష్‌,
9949083327