సున్నితం

ఇతరుల స్వేచ్ఛలో
ఒక అంగుళమైనా ఆక్రమించలేని
అతి సున్నితమైన సమాజాన్ని కలగంటావు

జరుగుతుందీ, జరగదని కాదు
కలగనటం సున్నితమైన పిలుపు
పూవు లేత ఎండని పిలిచినట్టు
లేత ఎండలాంటి సీతాకోకని పిలిచినట్టు
సీతాకోకలాంటి నీ చూపుని పిలిచినట్టు
సున్నితత్వం బోధిస్తే వచ్చేది కాదు
నిర్బంధించి నేర్పేది కాదు
భయపెట్టి తీర్చిదిద్దేది కాదు
అది లోపలి పొరల్లోకి మెలకువ
చేతన తనని విప్పుకోవటం

నువ్వు సహజంగా సున్నితం
లేత ఎండకన్నా, పూవు వికసించటం కన్నా
సీతాకోక రెక్కలపై వాలే చూపు కన్నా

నీలోకి నువ్వు
మరికాస్త దగ్గరగా జరిగినప్పుడు,
నిన్ను నువ్వు ముడుచుకొన్నప్పుడు,
వాన వెలిసాక ముడిచిన గొడుగులో
పొరలు విప్పుకొనే వెచ్చదనంలా
నీలోకి నువ్వు చేరుతున్నప్పుడు

నీకు తొలిసారి తెలుస్తుంది
నిజానికి నువ్వు చాలా సున్నితమని,
చిరుగాలికి గాయపడేంత లలితమని,
తొలి వేకువ వెలుతురు కూడా
నిను తాకటానికి జంకుతుందని

నువ్వు ఎంత సున్నితమో
నీకు తెలిస్తే చాలు
మనిషి కథ సుఖాంతమౌతుంది

ఆ క్షణం కోసం కదా
ఇంత విశ్వం
నానమ్మ కథలోని సుఖాంతం కోసం
పిల్లలు ఎదురుచూసినట్టు చూస్తోంది

బివివి ప్రసాద్‌
90320 75415