ప్రజాశక్తి – మంగళగిరి (గుంటూరు జిల్లా) : దక్షిణాఫ్రికా సన్‌సిటీలో జరుగుతున్న కామన్‌వెల్త్‌ పవర్‌ లిఫ్టింగ్‌ పోటీల్లో సాదియా ఆల్మాస్‌ నాలుగు బంగారు పతకాలు సాధించారని గుంటూరు జిల్లా పవర్‌ లిఫ్టింగ్‌ అసోసియేషన్‌ అధ్యక్షులు కొమ్మాకుల విజయ భాస్కరరావు, ప్రధాన కార్యదర్శి షేక్‌ సంధాని తెలిపారు. మంగళగిరిలో వారు ఆదివారం మీడియాతో మాట్లాడుతూ.. ఈ నెల 4 నుండి 13వ తేదీ వరకు సన్‌ సిటీలో జరుగుతున్న కామన్‌వెల్త్‌ పవర్‌ లిఫ్టింగ్‌ సబ్‌ జూనియర్‌, జూనియర్‌ పోటీల్లో గుంటూరు జిల్లా మంగళగిరికి చెందిన షేక్‌ సాదియా అల్మాస్‌ 57 కిలోల అండర్‌ జూనియర్‌ విభాగంలో స్క్వాట్‌ -185 కిలోల పవర్‌ లిఫ్టింగ్‌లో బంగారు పతకం, బెంచ్‌ప్రెస్‌ 95 కిలోలు, డెడ్‌లిఫ్ట్‌ 180 కిలోలు ఓవరాల్‌గా 460 కిలోలు లిఫ్టింగ్‌లో బంగారు పతకాలు సాధించారని పేర్కొన్నారు. ఈ విజయం పట్ల ఐటి శాఖ మంత్రి నారా లోకేష్‌ అభినందనలు తెలిపారు. అల్మాస్‌ను, ఆమెకు శిక్షణ ఇచ్చిన కోచ్‌ షేక్‌ సంధానిని సౌత్‌ ఇండియా పవర్‌ లిఫ్టింగ్‌ అసోసియేషన్‌ ఆర్గనైజింగ్‌ సెక్రటరీ సకల కోటేశ్వరావు, ఎపి పవర్‌ లిఫ్టింగ్‌ అసోసియేషన్‌ అధ్యక్షులు గంటా వెంకటేశ్వరరావు, ప్రధాన కార్యదర్శి సకల సూర్యనారాయణ, గౌరవాధ్యక్షులు మద్ది ప్రభాకరరావు తదితరులు అభినందనలు తెలిపారు.
తాజా వార్తలు
