- శ్రీలంకపై 82పరుగుల తేడాతో ఘన విజయం
దుబాయ్: ఐసిసి మహిళల టి20 ప్రపంచ కప్‌లో హర్మన్‌ప్రీత్‌ సేన తొలిసారి జూలు విదిలించింది. భారీ రన్‌రేట్‌ లక్ష్యంగా శ్రీలంక మహిళలతో పోరుకు సిద్ధమైన భారత బ్యాటర్లు 82పరుగుల తేడాతో ఘన విజయం సాధించి సెమీస్‌ రేసులో నిలిచింది. గ్రూప్‌-ఎ చివరి లీగ్‌ మ్యాచ్‌లో ఆస్ట్రేలియాపై గెలిస్తే సెమీస్‌ ఛాన్స్‌ దక్కనుంది. తొలుత బ్యాటింగ్‌కు దిగిన హర్మన్‌ప్రీత్‌ సేన నిర్ణీత 20 ఓవర్లలో 3వికెట్ల నష్టానికి 172పరుగుల భారీస్కోర్‌ను నమోదు చేశారు. ఛేదనలో శ్రీలంక జట్టు 19.5ఓవర్లలో 90పరుగులకే ఆలౌట్‌ చేసింది. అరుంధతి రెడ్డి, శోభనకు మూడేసి వికెట్లు, రేణుకకు రెండు వికెట్లు దక్కాయి. ప్లేయర్‌ ఆఫ్‌ ది మ్యాచ్‌ హర్మన్‌ప్రీత్‌కు దక్కింది. ఈ గెలుపుతో భారత్‌ గ్రూప్‌-ఎలో 3మ్యాచ్‌లు ముగిసేసరికి 4పాయింట్ల తో ప్రస్తుతం 2వ స్థానంలో ఉంది. తొలుత ఓపెనర్లు స్మృతి మంధాన(50), షఫాలీ వర్మ(43) తొలిసారి అదిరే ఆరంభమివ్వగా.. చివర్లో హర్మన్‌ప్రీత్‌ కౌర్‌(52 నాటౌట్‌) కెప్టెన్‌ ఇన్నింగ్స్‌ ఆడింది. ఆఖరి ఓవర్లో వరుసగా రెండు బంతుల్ని బౌండరీకి పంపి అర్ధ శతకంతో జట్టు స్కోర్‌ 170 దాటించింది. ఈ టి20 ప్రపంచ కప్‌లో ఇదే అత్యధిక స్కోర్‌. తొలి మ్యాచ్‌లో న్యూజిలాండ్‌ చేతిలో ఘోర పరాజయాన్ని చవిచూడగా.. ఆ తర్వాత పాకిస్థాన్‌పై గెలిచాము చాలు అన్న ఫీలింగ్‌. ఈ దశలో మూడో మ్యాచ్‌లో లంకను దాటితేగానీ సెమీస్‌ చేరడం కష్టమనే దశలో భారత అమ్మాయిలు బ్యాట్‌ ఝుళిపించారు. లంక స్పిన్నర్లు దీటుగా ఎదుర్కొంటూ లెగ్‌ సైడ్‌లో బౌండరీలు బాదేసింది. దాంతో.. టీమిండియా స్కోర్‌ వడివడిగా.. 150 దాటేసింది. ఆఖరి మూడు ఓవర్లలో మరింత రెచ్చిపోయిన కౌర్‌ బౌండరీలతో విరుచుకుపడింది. రీచా ఘోష్‌(6) అండగా ధనాధన్‌ ఆడింది. చివరి ఓవర్లో రెండు ఫోర్లతో అర్ధ సెంచరీ సాధించిన ఆమె లంకకు 173 పరుగుల లక్ష్యాన్ని నిర్దేశించింది. శ్రీలంక కెప్టెన్‌ ఆటపట్టు, కాంచనకు ఒక్కో వికెట్‌ దక్కాయి.
స్కోర్‌బోర్డు…
ఇండియా మహిళల ఇన్నింగ్స్‌: షెఫాలీ వర్మ (సి)గుణరత్నే (బి)ఆటపట్టు 43, మంధాన (రనౌట్‌) కాంచన/ఆటపట్టు 50, హర్మన్‌ప్రీత్‌ (నాటౌట్‌) 52, రోడ్రిగ్స్‌ (సి)ప్రభోధన (బి)కాంచన 16, రీచా (నాటౌట్‌) 6, అదనం 5. (20 ఓవర్లలో 3వికెట్ల నష్టానికి) 172పరుగులు.
వికెట్ల పతనం: 1/98, 2/98, 3/128 బౌలింగ్‌: ప్రియదర్శిని 2-0-11-0, సుగంధిక 3-0-29-0, ప్రభోధని 3-0-32-0, కవిషా 2-0-11-0, రణవీరా 3-0-26-0, ఆటపట్టు 4-0-34-1, కాంచన 3-0-29-1.
శ్రీలంక మహిళల ఇన్నింగ్స్‌: వైష్ణవి (సి)రాధా (బి)రేణుక 0, ఆటపట్టు (సి)దీప్తి (బి)శ్రేయాంక 1, దిల్హరి (సి)రేణుక (బి)అరుంధతి 21, అన్షుక (స్టంప్‌) రీచా (బి)శోభన 20, నీలాక్షి (సి)షెఫాలీ (బి)అరుంధతి 8, కాంచన (సి)రాధా (బి)అరుంధతి 19, సుగంధిక (సి)రీచా (బి)శోభన 1, ఇనోషీ (సి)రాధా (బి)శోభన 1, ఉదేషికా (సి)మంధాన (బి)దీప్తి 9, ఇనోకా (నాటౌట్‌) 2, అదనం 5. (19.5ఓవర్లలో ఆలౌట్‌) 90పరుగులు.
వికెట్ల పతనం: 1/0, 2/4, 3/6, 4/43, 5/57, 6/58, 7/61, 8/65, 9/86, 10/90 బౌలింగ్‌ : రేణుకా 4-0-16-2, శ్రేయాంక 4-0-15-1, దీప్తి 3.5-0-16-1, అరుంధతి 4-0-19-3, శోభన 4-0-19-3.
