న్యూఢిల్లీ : వచ్చే ఏడాది ఢిల్లీ రాష్ట్ర అసెంబ్లీ ఎన్నికలు జరగనున్నాయి. ఈ నేపథ్యంలో ఆప్‌ కన్వీనర్‌ కేజ్రీవాల్‌ మహిళా సమ్మాన్‌ యోజన, వృద్ధుల చికిత్స కోసం ‘సంజీవని యోజన’ పథకాలను ప్రకటించారు. అయితే ఈ పథకాలను ప్రభుత్వం నోటిఫై చేయలేదని పబ్లిక్‌ నోటీస్‌ రిలీజ్‌ అయింది. ఇది బుధవారం ఢిల్లీలోని అన్ని ప్రధాన పత్రికల్లో అయింది. ఈ నోటీస్‌పై బిజెపి నేతలు తీవ్రస్థాయిలో ప్రభుత్వంపై విమర్శలు చేశారు. కేజ్రీవాల్‌ ప్రజల్ని మోసం చేస్తున్నారని తీవ్రంగా ఆరోపించారు. ఎన్నికల కోసమే హామీలను ప్రకటించారని, వాటిని ఇప్పుడు తుంగలో తొక్కుతున్నారని విమర్శించారు. బిజెపి నేతల విమర్శలపై ఢిల్లీ సిఎం అతిషి స్పందించారు. ఆ వార్తలు అవాస్తవమని ఆమె స్పష్టం చేశారు. ‘ఈరోజు వార్తా పత్రికల్లో అచ్చయిన పబ్లిక్‌ నోటీస్‌లు తప్పుడువి. బిజెపి నేతల ఒత్తిడి మేరకు ప్రభుత్వంలోని కొందరు అధికారులు ఆ నోటీస్‌లు ఇచ్చారు. ఇదంతా బీజేపీ కుట్ర. ఈ తప్పుడు నోటీస్‌ ఇచ్చిన అధికారులపై పాలనా యంత్రాంగం, పోలీసులు తగిన చర్యలు తీసుకుంటారు. మహిళా సమ్మాన్‌ యోజన, సంజీవని యోజన పథకాలు ఇప్పటికే ప్రజా బాహుళ్యంలోకి వెళ్లాయి. వాటిని కచ్చితంగా అమల్లోకి తీసుకొస్తాం’ అని సీఎం అతిషి హామీ ఇచ్చారు.
తాజా వార్తలు
