చెన్నై : దక్షిణ తమిళనాడుకు చెన్నైలోని ప్రాంతీయ వాతావరణ కేంద్రం కీలక హెచ్చరికలను జారీ చేసింది. మంగళవారం దక్షిణ తమిళనాడులోని కన్యాకుమారి, తెన్కాసి, తిరునెల్వేలి, తూత్తుకుడి నాలుగు జిల్లాల్లో భారీ నుంచి అతి భారీ వర్షం కురిసే అవకాశం ఉందని ఆర్‌ఎంసీ తెలిపింది. రాష్ట్ర రాజధాని చెన్నైకు ఆర్‌ఎంసీ ఎల్లో అలర్ట్‌ జారీ చేసింది. మంగళవారం చెన్నైలో మోస్తరు వర్షం లేదా ఉరుములతో కూడిన వర్షం కురిసే అవకాశం ఉందని అంచనా వేసింది. హిందూ మహాసముద్రం, నైరుతి బంగాళాఖాతం మీదుగా ఏర్పడిన అల్ప పీడన ప్రభావంతో ఈ వర్షాలు కురుస్తాయని వెల్లడించింది. అల్ప పీడన ప్రభావంతో ఉష్ణోగ్రతలు తగ్గి ఆకాశం మేఘావృతమై ఉంటుందని తెలిపింది. శివగంగ, పుదుకోట్టై, రామనాథపురం, తిరువారూరు జిల్లాలో కూడా వానలు కురిసే అవకాశం ఉందని ఆర్‌ఎంసీ పేర్కొంది. ఈ తుపాన్‌ ప్రభావంతో బుధవారం కూడా వివిధ ప్రాంతాల్లో వర్షం పడే అవకాశం ఉందని అంచనా వేసింది. కన్యాకుమారి, తిరునల్వేలి, తూత్తుకుడి జిల్లాలో బుధవారం భారీ వర్షాలు కురుస్తాయని అధికారులు అంచనా వేశారు. వర్షం, తుపాన్‌ హెచ్చరికల నేపథ్యంలో ప్రభావిత ప్రాంతాల్లోని పాఠశాలలు, కళాశాలలకు సెలవులు ప్రకటించే విషయాన్ని తమిళనాడు ప్రభుత్వం పరిశీలిస్తున్నట్లు సమాచారం. భారీ వర్షం కురిసే సమయంలో… అలాగే తుపాన్‌ తీరం సమయంలో ప్రజలు ఇండ్ల నుంచి బయటకు వెళ్లద్దని.. అత్యవసరమైతేనే తప్ప బయటకు రావొద్దని అధికారులు సూచించారు.
తాజా వార్తలు
