కొత్తమంగళం : ఆవును వెతుక్కుంటూ వెళ్లిన ముగ్గురు మహిళలు కేరళలోని కుట్టంపుజా అడవుల్లో చిక్కుకుపోయారు. అట్టిక్కల్ అటవీ ప్రాంతంలో వీరు అదృశ్యమైనట్లు సమాచారం. మలెక్కుడి మాయ జయన్, కవుక్కుడి పారుకుట్టి కుంజుమోన్, పుత్తన్‌పురా డార్లీ స్టీఫెన్ ముగ్గురు మహిళలు గురువారం సాయంత్రం 5.30 గంటల నుంచి కనిపించకుండాపోయారు. ఆవును వెతుక్కుంటూ ముగ్గురూ గురువారం మధ్యాహ్నం ఒంటి గంట సమయంలో అడవిలోకి వెళ్లారు. సాయంత్రం 5.30 గంటల వరకు తమ వద్ద ఉన్న ఫోన్‌తో సంభాషించారని కుటుంబీకులు చెబుతున్నారు. ఆ తర్వాత ఫోన్ కనెక్షన్ పోయింది. దీంతో స్థానికులు పోలీసులకు, ఫారెస్ట్‌ గార్డులకు సమాచారం అందించారు. కుట్టంపుజా పోలీస్ ఇన్‌స్పెక్టర్ పి.ఎ.ఫైసల్ నేతృత్వంలోని పోలీసు బృందం, అటవీ సిబ్బంది, అగ్నిమాపక దళం మరియు స్థానికులు సంఘటనా స్థలంలో సోదాలు నిర్వహిస్తున్నారు. ఈ ప్రాంతంలో అడవి ఏనుగులు సంచరించడం స్థానికులను ఆందోళనకు గురిచేస్తోంది. అత్యాధునిక సదుపాయాలను వినియోగించుకుని విస్తృతంగా సోదాలు నిర్వహించేందుకు అధికారులు ప్రయత్నిస్తున్నారు.
అడవుల్లో గల్లంతైన ముగ్గురు మహిళల కోసం గాలింపు చర్యలు కొనసాగుతున్నాయని అటవీ శాఖ మంత్రి ఎకె శశీంద్రన్ తెలిపారు. అటవీశాఖ ఉద్యోగులు, ఫైర్‌ ఫోర్స్‌, స్థానికులు, ఫారెస్ట్‌ వాచర్లను వెతుకులాటకు పూనుకున్నారని పేర్కొన్నారు. గల్లంతైన వారి ఆచూకీ కోసం మరిన్ని బృందాలను రంగంలోకి దింపినట్లు మంత్రి శశీంద్రన్ ప్రకటించారు. మరింత మంది పోలీసు, అటవీ శాఖ అధికారులను మోహరిస్తామని తెలిపారు. డ్రోన్‌ల ద్వారా సెర్చ్‌ చేయాలని కలెక్టర్‌ను అటవీశాఖ మంత్రి ఆదేశించారు.
