ఎంఇవో కార్యాలయాల్లో దరఖాస్తుల స్వీకరణ
ప్రజాశక్తి-అమరావతి బ్యూరో : కస్తూర్బా గాంధీ బాలికల విద్యాలయా(కెజిబివి)ల్లో ఖాళీగా ఉన్న 729 బోధనేతర (నాన్‌టీచింగ్‌) సిబ్బంది పోస్టులను పొరుగు సేవల (ఔట్‌సోర్సింగ్‌) ప్రాతిపదికన భర్తీ చేసేందుకు దరఖాస్తులు స్వీకరిస్తున్నట్లు సమగ్ర శిక్ష డైరెక్టర్‌ బి.శ్రీనివాసరావు వెల్లడించారు. 2024-25 విద్యాసంవత్సర కాలానికి అర్హులైన మహిళా అభ్యర్థుల నుంచి ఈ నెల 7వ తేదీ నుంచి దరఖాస్తులు స్వీకరిస్తామని శుక్రవారం ఒక ప్రకటనలో తెలిపారు. ఆసక్తిగల అభ్యర్థులు ఈ నెల 15వ తేదీలోపు ఎంఇవో కార్యాలయంలో దరఖాస్తులు ఆఫ్‌లైన్‌లో అందించాలని పేర్కొన్నారు. రాష్ట్రవ్యాప్తంగా ఉన్న టైప్‌-3 కెజిబివిల్లో 547 పోస్టుల్లో హెడ్‌కుక్‌ 48, అసిస్టెంట్‌ కుక్‌ 263, వాచ్‌ ఉమెన్‌ 95, స్కావెంజర్‌ 79, స్వీపర్‌ 62 ఖాళీలు ఉన్నాయని తెలిపారు. టైప్‌-4 కెజిబివిల్లో 182 పోస్టులకుగాను హెడ్‌ కుక్‌ 48, అసిస్టెంట్‌ కుక్‌ 76, చౌకీదార్‌ 58 ఉన్నాయని వివరించారు. ఈ నెల 7వ తేదీన జిల్లా, మండల స్థాయిల్లో పేపర్‌ నోటిఫికేషన్‌ విడుదలవుతుందని తెలిపారు. మండల, జిల్లా స్థాయిల్లో వచ్చిన దరఖాస్తులు 21వ తేదీన జిల్లాస్థాయి ఎంపిక కమిటీకి వస్తాయని పేర్కొన్నారు. వీటిని అప్కాస్‌ ఛైర్మన్‌కు 22వ తేదీన పంపుతారని వెల్లడించారు.
తాజా వార్తలు
