కంపెనీ యాజమాన్యాలపై క్రిమినల్‌ చర్యలు తీసుకోవాలి
సిపిఎం డిమాండ్
ప్రజాశక్తి-అనకాపల్లి : అనకాపల్లి జిల్లా అచ్యుతాపురం సెజ్‌లోని రాంబిల్లి వద్ద గల వసంత కెమికల్స్‌లో రియాక్టర్‌ పేలిన ప్రమాదంలో ఒడిశాకు చెందిన ప్రదీప్‌రౌత్‌ (44) అనే కార్మికుడు మరణించారు. మరణించిన కార్మికుడి కుటుంబానికి కోటి రూపాయాలు పరిహారం ఇవ్వాలని సిపిఎం అనకాపల్లి జిల్లా కమిటీ డిమాండ్ చేస్తోంది. ఈ ప్రమాదంపై సమగ్ర విచారణ జరిపి కంపెనీ యాజమాన్యాలపై క్రిమినల్‌ చర్యలు తీసుకోవాలని డిమాండ్ చేస్తోంది.
ఫార్మాసిటీలో కార్మికుల ప్రాణాలను యాజమాన్యాలు గాలికి వదిలేస్తున్నాయి. భద్రతా ప్రమాణాలు పాటించడంలో ఫార్మా కంపెనీలు తీవ్ర నిర్లక్ష్యంగా వ్యవహరిస్తున్నాయి. కార్మికులకు పని ప్రదేశాల్లో భద్రత లేకుండా పోతుంది. ప్రమాదాలు జరిగినప్పుడు మాత్రమే కమిటీల పేరుతో హడావడి చేస్తున్నారు. కంపెనీల్లో ఉన్న లోపాలపై నిరంతరం తనిఖీలు చేయడంలేదు. ఇన్ని ప్రమాదాలు సంభవిస్తున్నా పొల్యూషన్‌ కంట్రోల్‌ బోర్డ్‌, ఫ్యాక్టరీస్‌ ఆప్‌ ఇన్‌స్పెక్టర్‌ అధికారులు నిమ్మకునీరెత్తినట్లు వ్యవహరిస్తున్నారు. ఇటీవల కొత్తగా వచ్చిన జిల్లా కలెక్టర్‌ గారు పారిశ్రామిక అధిపతులతో సమావేశం నిర్వహించారు. ఈ సమావేశం నిర్వహించి నాలుగు రోజులు గడవక ముందే ఈ ప్రమాదం సంభవించింది. జిల్లా అధికార యంత్రాంగం ప్రమాదాలకు కారణమైన కంపెనీలపై చట్టపరమైన చర్యలు తీసుకోకపోవడం వల్లే తరుచూ ఈ ప్రమాదాలు సంభవిస్తున్నాయి. గతంలో కూడా పరవాడ, అచ్యుతాపురం సెజ్‌ల్లో జరిగిన ప్రమాదాలపై అధికార యంత్రాంగంతో కమిటీలు వేసి విచారణ నిర్వహించారు. ఆ కమిటీలు ఇచ్చిన నివేదికలు బహిర్గతం చేసి కంపెనీ యాజమాన్యాలపై చర్యలు తీసుకొని వుంటే నేడు ఇలాంటి ప్రమాదాలు మరలా సంభవించేవికాదు. వెంటనే రాష్ట్ర ప్రభుత్వం, జిల్లా అధికార యంత్రాంగం స్పందించి ప్రమాదాలకు కారణమైన కంపెనీపై సమగ్ర విచారణ జరిపి క్రిమినల్‌ చర్యలు తీసుకోవాలని సిపిఎం డిమాండ్ చేస్తోంది.
