ప్రజాశక్తి- తిరుమల : ఎస్‌వి అన్న ప్రసాదం ట్రస్టుకు విరాళం ఇచ్చేందుకు తిరుమలలోని మాతృశ్రీ తరిగొండ వెంగమాంబ అన్నప్రసాద కేంద్రంలో కియోస్క్‌ మిషన్‌ను టిటిడి ఏర్పాటు చేసింది. టిటిడి అడిషనల్‌ ఇఒ సిహెచ్‌ వెంకయ్య చౌదరి బుధవారం దీనిని ప్రారంభించారు. టిటిడికి ఈ మిషన్‌ను విరాళంగా కెనరా బ్యాంకు అందించింది. ఈ మిషన్ల ద్వారా సందర్శకులు ఎస్‌వి అన్నప్రసాదం ట్రస్టుకు సులభతరంగా విరాళం అందిచవచ్చు. రూ.1 నుండి రూ.99,999 వరకు తమకు తోచిన మొత్తాన్ని సందర్శకులు కియోస్క్‌ మిషన్‌లోని క్యూ ఆర్‌ కోడ్‌ను స్కాన్‌ చేసి యుపిఐ ద్వారా విరాళం ఇవ్వవచ్చు. ఈ సందర్భంగా అడిషనల్‌ ఇఒ మీడియాతో మాట్లాడుతూ టిటిడిని పూర్తిగా డిజటలైజేషన్‌ చేయడంలో భాగంగా ఈ మిషన్‌ను అందుబాటులోకి తీసుకొచ్చినట్లు తెలిపారు. భవిష్యత్తులో మరిన్ని కియోస్క్‌ మిషన్లను ఏర్పాటు చేస్తామని చెప్పారు. కార్యక్రమంలో డిప్యూటీ ఇఒలు లోకనాథం, రాజేంద్ర, కెనరా బ్యాంకు డిజిఎం రవీంద్ర అగర్వాల్‌, ఎజిఎం నాగరాజురావు, తిరుమల బ్రాంచ్‌ మేనేజర్‌ రాఘవన్‌ తదితరులు పాల్గొన్నారు.
తాజా వార్తలు
