ప్రజాశక్తి-అమరావతి బ్యూరో : పోలవరం ప్రాజెక్టును 45.72 మీటర్ల ఎత్తుకు నిర్మించి నీటిని నిల్వ చేస్తామని, ఈ విషయంలో ఎంతమాత్రం రాజీపడబోమని జలవనరులశాఖ మంత్రి నిమ్మల రామానాయుడు వెల్లడించారు. సచివాలయంలో శుక్రవారం ఆయన విలేకరులతో మాట్లాడారు. పోలవరం ప్రాజెక్టు 41.14 మీటర్ల ఎత్తుకే నిర్మిస్తామని గత సిఎం వైఎస్‌ జగన్‌మోహన్‌రెడ్డి ప్రభుత్వం ఈ ఏడాది ఫిబ్రవరి 29న కేంద్రానికి ప్రతిపాదన పంపిందని చెప్పారు. సవరించిన ధరను కమిటీ రూ.47,617 కోట్లకు ఆమోదం తెలిపిందన్నారు. ఈ ప్రకారం కేంద్ర కేబినెట్‌ పోలవరానికి రూ.12,157 కోట్లు మంజూరు చేసిందని తెలిపారు. వైసిపి నేతలు పోలవరంపై ప్రజలను తప్పుదోవ పట్టించే ప్రచారం చేస్తున్నారని ఆగ్రహం వ్యక్తం చేశారు. సిఎం చంద్రబాబు నేతృత్వంలో ప్రాజెక్టు డయాఫ్రం వాల్‌ ఇతర పనులను తిరిగి పునర్నిర్మిస్తామన్నారు.
తాజా వార్తలు
