ప్రజాశక్తి-అమరావతి : గ్రూప్‌-2 నోటిఫికేషన్‌లో వికలాంగులు, మహిళలు, ఎక్స్‌ సర్వీస్‌మెన్‌, క్రీడాకారులకు ప్రత్యేక రిజర్వేషన్‌ పాయింట్లు కేటాయించడంపై హైకోర్టులో పిటిషన్‌ దాఖలైంది. ఎగ్జిక్యూటివ్‌, నాన్‌ ఎగ్జిక్యూటివ్‌ పోస్టుల భర్తీ నిమిత్తం ఈ నెల 23న నిర్వహించనున్న ప్రధాన పరీక్షను నిలుపుదల చేయాలని అనుబంధ పిటిషన్‌ దాఖలైంది. వీటిని మంగళవారం విచారణ పూర్తి చేసిన జస్టిస్‌ సుబ్బారెడ్డి తీర్పును వాయిదా వేస్తున్నట్లు ప్రకటించారు. ఆర్కే సబర్వాల్‌ కేసులో సుప్రీంకోర్టు ఇచ్చిన తీర్పునకు అనుగుణంగా గ్రూప్‌-2 పోస్టుల భర్తీకి రిజర్వేషన్ల రోస్టర్ను ఖరారు చేయాలని ఎం పార్థసారధి పిటిషన్‌ దాఖలు చేశారు. గ్రూప్‌-2లో ఎగ్జిక్యూటివ్‌, నాన్‌ ఎగ్జిక్యూటివ్‌ పోస్టుల భర్తీలో ఆ రిజర్వేషన్ల కల్పనతో ప్రత్యేక రోస్టర్ను ఖరారు చేయడాన్ని కడపకు చెందిన కనుపర్తి పెంచలయ్య, ఇతరులు వ్యాజ్యాలు దాఖలు చేశారు. ఈ నెల 23న జరగనున్న గ్రూప్‌-2 ప్రధాన పరీక్షను నిలిపేస్తూ మధ్యంతర ఉత్తర్వులు ఇవ్వాలని పిటిషనర్ల న్యాయవాదులు కోరారు. దీనిపై ఎజి దమ్మాలపాటి శ్రీనివాస్‌ స్పందిస్తూ, ప్రిలిమినరీ పరీక్ష ఇప్పటికే పూర్తయిందని అన్నారు. మధ్యంతర ఉత్తర్వులు అవసరం లేదన్నారు. వాదనల తర్వాత హైకోర్టు తీర్పును రిజర్వు చేసింది.
తాజా వార్తలు
