- విపత్తుల నిర్వహణ సంస్థ
ప్రజాశక్తి – అమరావతి బ్యూరో : ఆగ్నేయ బంగాళాఖాతానికి ఆనుకుని ఉన్న హిందూ మహా సముద్రం మీదుగా ఆవర్తనం ఏర్పడిందని రాష్ట్ర విపత్తుల నిర్వహణ సంస్థ పేర్కొంది. ఈ మేరకు ఆదివారం ఆ సంస్థ ఎమ్‌డి రోణంకి కూర్మనాథ్‌ ఒక ప్రకటన విడుదల చేశారు. రానున్న 48 గంటల్లో బలపడి పశ్చిమ వాయువ్య దిశగా ఉత్తర తమిళనాడు, పుదుచ్చేరి, దక్షిణ కోస్తా తీరాల వైపు కదిలే అవకాశం ఉందని తెలిపారు. మత్స్యకారులు వేటకు వెళ్లరాదని, బుధ, గురువారాల్లో అక్కడక్కడ భారీ నుంచి అతి భారీ వర్షాలు పడే అవకాశం ఉందన్నారు. నేడు, రేపు బాపట్ల, ప్రకాశం, నెల్లూరు, కర్నూలు, నంద్యాల జిల్లాల్లోని కొన్ని ప్రాంతాల్లో మోస్తరు నుంచి భారీ వర్షాలు పడే అవకాశం ఉందన్నారు. నెల్లూరు, వైఎస్‌ఆర్‌, అన్నమయ్య, చిత్తూరు, తిరుపతి, విశాఖ, అనకాపల్లి, అంబేద్కర్‌ కోనసీమ జిల్లాల్లో తేలికపాటి నుంచి మోస్తరు వర్షాలకు అవకాశం ఉందన్నారు. పశ్చిమగోదావరి, కృష్ణా, పల్నాడు జిల్లాల్లోని కొన్ని ప్రాంతాల్లో తేలికపాటి నుంచి మోస్తరు వర్షాలు పడే అవకాశం ఉందన్నారు. భారీ వర్షాలకు వాగులు, కాలువలు పొంగి పొర్లే అవకాశం ఉందన్నారు. పాత బిల్డింగ్స్‌ వదిలి ప్రజలు సురక్షిత భవనాల్లో ఉండాలన్నారు. పొలాల్లో పనిచేసే రైతులు, కూలీలు, పశువులు, గొర్రెల కాపరులు చెట్లు కింద, పోల్స్‌, టవర్స్‌ కింద బహిరంగ ప్రదేశాల్లో ఉండరాదని సూచించారు.
