నామినేషన్ల వేళ .. రాష్ట్రంలో పలుచోట్ల ఉద్రిక్తతలు

అమరావతి : నామినేషన్ల వేళ ... రాష్ట్రంలో శనివారం కూడా పలు చోట్ల ఉద్రిక్తతలు చోటుచేసుకున్నాయి. అన్నమయ్య జిల్లా రాయచోటిలో మరోసారి ఉద్రిక్తత నెలకొంది. వైసిపి, టిడిపి వర్గాల మధ్య ఘర్షణ రాజుకుంది. ఇరు వర్గాల ఘర్షణలో పలువురికి గాయాలవ్వగా, ఓ కారు ధ్వంసమయ్యింది. ఈ క్రమంలో పలువురిని పోలీసులు అరెస్టు చేశారు. మరోవైపు ... కడప నగరంలోని పలు నామినేషన్ కేంద్రాల వద్ద ఉద్రిక్త పరిస్థితులు నెలకొన్నాయి. కాగితాలపెంట నామినేషన్‌ కేంద్రం వద్ద టిడిపి, వైసిపి వర్గీయులు కత్తులతో దాడులు చేసుకున్నారు. ఈ దాడిలో ముగ్గురికి తీవ్రగాయాలయ్యాయి. మరియాపురం నామినేషన్ సెంటర్ వద్ద ఘర్షణ చోటుచేసుకుంది. గాంధీనగర్‌ పాఠశాల వద్ద టిడిపి, వైసిపి కార్యకర్తలు కర్రలు, రాళ్లతో దాడి చేసుకున్నారు. నాగరాజుపేట, సెయింట్‌ జోసెఫ్‌ నామినేషన్‌ కేంద్రాల వద్ద ఇరువర్గాలు ఘర్షణకు దిగాయి. మరోవైపు మైదుకూరు పురపాలక సంఘం కార్యాలయం వద్ద ఉద్రిక్త పరిస్థితులు తలెత్తాయి. వైసిపి-టిడిపి వర్గీయులు పరస్పరం దాడి చేసుకున్నారు. పులివెందులలో ఘర్షణ చోటుచేసుకుంది. ఉద్రిక్తతను అదుపు చేసేందుకు పోలీసులు గాల్లోకి ఆరు రౌండ్లు కాల్పులు జరిపారు. కడప జిల్లా పులివెందులలో నామినేషన్‌ వేసేందుకు వచ్చిన వైసిపి కార్యకర్తలు పోలీసులపైకి రాళ్లు విసరడంతో వారిని అదుపు చేసేందుకు పోలీసులు గాల్లోకి కాల్పులు జరిపారు. తిరుపతిలో వైసిపి మేయర్‌ అభ్యర్థి వాసు యాదవ్‌ తరఫున నామినేషన్‌ వేసేందుకు వెళ్లిన ఎమ్మెల్సీ సిపాయి సుబ్రహ్మణ్యాన్ని టిడిపి కార్యకర్తలు అడ్డుకున్నారు. నామినేషన్‌ కు వెళ్లే ప్రజాప్రతినిధులకు రక్షణ కల్పించకపోవడం పోలీసు యంత్రాంగం వైఫల్యమని తిరుపతి ఎంపి డాక్టర్‌ మద్దిల గురుమూర్తి ఆరోపించారు.