- పార్లమెంట్ స్క్వేర్ వద్ద భారీ నిరసన
- సిఇసి రాజీనామాకు డిమాండ్
లండన్: భారత ఎన్నికల ప్రధాన కమిషనర్ (సిఇసి) జ్ఞానేష్‌ కుమార్ రాజీనామా చేయాలని డిమాండ్ చేస్తూ లండన్ వీధుల్లో భారత సంతతి విద్యార్థులు కదంతొక్కారు. శనివారం పార్లమెంట్ స్క్వేర్‌‌లో నినాదాలతో హోరేత్తించారు. ‘‘56 అంగుళాల కా ఛోటా బందర్! బాల నరేందర్‌, బాల్ నరేందర్‌!’’ అంటూ నినదించారు. అంతేకాదు, ఒక నిరసనకారుడు ఒక చిన్న కోతి బొమ్మను కూడా ప్రదర్శించాడు. యూట్యూబర్ ధ్రువ రాఠే ఇచ్చిన పిలుపుతో వేలాదిగా విద్యార్థులు నిరసన తెలిపారు. ఈ సందర్భంగా ధ్రువ రాఠే మాట్లాడుతూ ఎన్నికల కమిషన్‌‌లో జవాబుదారీతనం కోసం పోరాటం కొనసాగుతుందన్నారు. సిఇసి రాజీనామా చేయాల్సిందేనని ఆయన స్పష్టం చేశారు. అయితే, అదే సమయంలో సిఇసికి మద్దతుగా, కాక్రోచ్‌ జనతా పార్టీ (సిజెపి)కి వ్యతిరేకంగా బిజెపి మద్ధతుదారులు నినాదాలు చేశారు. దీంతో అక్కడ తీవ్ర ఉద్రిక్తత ఏర్పడింది. ధ్రువ్ రాఠే గత వారం జర్మనీ నుంచి భారత్‌కు తిరిగి వచ్చిన అనంతరం బెంగళూరులో జరిగిన సిజెపి నిరసనలోనూ పాల్గొన్న సంగతి తెలిసిందే.
లండన్లో వరుస నిరసనలు..
సిఇసికి వ్యతిరేకంగా లండన్లో వరుస ఆందోళనలు జరుగుతున్నాయి. శుక్రవారం భారత హైకమిషన్ ఎదుట భారత విద్యార్థి ఫెడరేషన్‌ (ఎస్ఎఫ్ఐ) యుకె విభాగం ఆందోళన నిర్వహించింది. అయితే, అక్కడ కూడా మోడీ మద్దతుదారులు పోటీ నిరసన చేశారు. అంతేకాకుండా విద్యార్థులను రెచ్చగొట్టేందుకు ముందుకు దూసుకువేళ్లారు. దీంతో లండన్ పోలీసులు వారిని అడ్డుకున్నారు. ఓటర్ల జాబితాల ప్రత్యేక సమగ్ర సవరణ (ఎస్ఐఆర్)ను రద్దు చేయాలని, సిఇసి జ్ఞానేష్‌ కుమార్ రాజీనామా చేయాలని విద్యార్థులు డిమాండ్ చేశారు. అయితే, బిజెపి మద్దతుదారులంతా వృద్దులు కాగా, వారికి ఎదురు నిలిచింది విద్యార్థులు కావడం గమనార్హం.
కామెంట్‌లు (0)