అబ్యే మార్కెట్‌పై డ్రోన్‌ దాడి.. 153 మంది మృతి
పశ్చిమ కొర్దోఫన్‌లో మరో 150 మంది బలి
సూడాన్‌లో వరుస డ్రోన్‌ దాడులు తీవ్ర విషాదాన్ని మిగిల్చాయి. ఈ దాడుల్లో 300 మందికిపైగా మరణించినట్లు స్థానిక అధికారులు, పర్యవేక్షణ సంస్థలు వెల్లడించాయి. సూడాన్‌, దక్షిణ సూడాన్‌ మధ్య వివాదాస్పద ప్రాంతమైన అబ్యేలోని అమియెట్‌ మార్కెట్‌పై జరిగిన దాడిలో 153 మంది మృతిచెందినట్లు అధికారులు తెలిపారు. మార్కెట్‌ సమీపంలోని ఇంధన నిల్వ కేంద్రం లక్ష్యంగా దాడి జరిగినట్లు సమాచారం. దాడి అనంతరం మంటలు చెలరేగడంతో సహాయక చర్యలకు ఆటంకం ఏర్పడింది. గాయపడిన వారికి ఆసుపత్రిలో చికిత్స అందిస్తున్నట్లు స్థానిక వర్గాలు తెలిపాయి.
పశ్చిమ కొర్దోఫన్‌లోని పలు ప్రాంతాల్లో జరిగిన దాడుల్లో మరో 150 మంది మరణించినట్లు సూడాన్‌ వార్‌ అబ్జర్వేటరీ పేర్కొంది. అల్‌-దబాబ్‌ ప్రాంతంలో వాహనంపై, అల్‌-ముజ్లాద్‌ ప్రాంతంలో మార్కెట్‌పై దాడులు జరిగినట్లు నివేదికలు వెల్లడించాయి. ఈ దాడులకు సూడాన్‌ సైన్యమే కారణమని దక్షిణ సూడాన్‌ అధికారులు ఆరోపించారు. దక్షిణ సూడాన్‌ ప్రభుత్వం ఘటనను ఖండిస్తూ సూడాన్‌ రాయబారిని పిలిపించింది. 2023 ఏప్రిల్‌ నుంచి కొనసాగుతున్న అంతర్యుద్ధంతో ఇప్పటికే సంక్షోభంలో ఉన్న సూడాన్‌లో తాజా దాడులు పౌరుల భద్రతపై ఆందోళనలను మరింత పెంచాయి.
కామెంట్‌లు (0)