- వర్షం నేపథ్యంలో తొక్కిసలాట
- 17 మంది మృతి - 30 మందికి పైగా గాయాలు
కొల్కతా: పశ్చిమబెంగాల్‌ రాజధాని కొల్‌కతాలో జరుగుతున్న దుర్మాదేవి శరన్నవరాత్రి వేడుకల్లో శనివారం సాయంత్రం మాటలకందని పెను విషాదం చోటుచేసుకుంది. శనివారం సాయంత్రం వర్షం నేపథ్యంలో తొక్కిసలాట చోటుచేసుకొని 17 నిండు ప్రాణాలు నలిగిపోయాయి. మరో 30 మంది పైగా గాయపడ్డారు. సెంట్రల్‌ కొల్‌కతాలోని ముక్తారామ్‌ బాబు వీధిలో చార్‌బగన్‌ సర్వోజనిన్‌ లో ఏర్పాటు చేసిన అమ్మవారి మండపం వద్ద ఈ దారుణ ఘటన చోటుచేసుకుంది. అయితే ఈ ఘటనపై అక్కడి బిజెపి నేతృత్వ రాష్ట్ర ప్రభుత్వం తీవ్ర నిర్లక్ష్యం వహించింది. స్థానికులే సకాలంలో స్పందించి గాయపడినవారిని సమీపంలోని ఆసుపత్రులకు తరలించారు. అయితే వారి పరిస్థితి విషమంగా ఉందని, దీంతో మరణాల సంఖ్య పెరగవచ్చునని ఆందోళన వ్యక్తం చేశారు. ఈ విషాద ఘటనపై టివిల్లో కథనాలు వచ్చాయని, వాస్తవంగా ఏం జరిగిందో తెలుసుకోవాల్సివుందని కొల్కతా పోలీసులు, మున్సిపల్‌ కార్పొరేషన్‌ అధికారులు శనివారం రాత్రి మీడియాతో చెప్పడం గమనార్హం. అయితే ఈ ఘటనపై సామాజిక మాధ్యమాల్లో ఆగ్రహం వ్యక్తంకావడంతో ఘటనాస్థలాన్ని ముఖ్యమంత్రి సువేందు అధికారి సందర్శించారు. అనంతరం ఆసుపత్రిలోనూ క్షతగాత్రులను పరామర్శించారు.
విపిఐ కల్చరే ప్రాణాలు తోడేసింది..
ప్రత్యక్ష సాక్షుల కథనం ప్రకారం.. చార్‌‌బగన్‌‌లో 91 ఏళ్లుగా శరన్నవరాత్రి వేడుకలు నిర్వహిస్తున్నారు. ఐదు రోజుల కిందటే ముఖ్యమంత్రి ఈ మండపాన్ని ప్రారంభించింది. దీనిని పూర్తిగా ఇనుప ఫ్రేమ్‌‌లతో చేశారు. పైకి ఎక్కడానికి మెట్లు కూడా ఏర్పాటు చేశారు. ఒక లైను విపిఐల కోసం పూర్తిగా కేటాయించారు. ఇంకొకటి సాధారణ ప్రజలకు కేటాయించారు. ఇది చాలా ఇరుకుగా ఉంది. సప్తమి కావడంతో శనివారం సాయంత్రం పూజలకు ప్రజలు వేలాదిగా తరలిచ్చారు. పది, పదిహేను మంది వాలంటీర్ల మాత్రమే ఇనుప రాడ్లతో ప్రజలను కంట్రోలు చేస్తున్నారు. అయితే ఉన్నట్టుండి వర్షం పడటంతో ప్రజలు తలదాచుకునేందుకు పరుగులు తీశారు. ఇదే సమయంలో ఇనుప మండపంలోని కొంత భాగం పడిపోవడం భయభ్రాంతులకు గురిచేసింది. దీంతో ఎవరు ఎక్కడ పరిగెడుతున్నారో తెలియని దుస్థితిలో తీవ్ర అయోమయం నెలకొనడం తొక్కిసలాటకు దారితీసింది. మండపంలో కొందరు చిక్కుకుపోగా..మరికొందరు మండపం మెట్లపైనే నలిగిపోయి ప్రాణాలొదిశారు.
విపిఐలకు కేటాయించిన మార్గాన్ని కూడా సాధారణ ప్రజలకు కేటాయించి వుంటే ఇంత దారుణం జరిగివుండేది కాదని అక్కడివారు వాపోయారు. ఇదే ప్రాంతంలో అందుబాటులో ఉండాల్సిన ప్రబతి ఘోష్‌ లేన్‌ అనే మార్గాన్ని కూడా పూర్తిగా మూసివేశారని, అది తెరిచివున్నా ప్రాణాలు దక్కేవని ప్రత్యక్ష సాక్షులు తెలిపారు. సమాచారం తెలిసినా కూడా పోలీసులు పూర్తిగా నిర్లక్ష్యం వహించారని, అంబులెన్సులు కూడా అక్కడకు చేరుకులేకపోయాయని ఆవేదన వ్యక్తం చేశారు. స్థానిక ప్రజలే సకాలంలో స్పందించి సహాయక చర్యలు చేపట్టారని, లేదంటే ఇంకా ఎక్కువ మంది ప్రాణాలు పోయేవని తెలిపారు.
కామెంట్‌లు (0)