గనులు ప్రభుత్వరంగంలో ఉంటేనే పురోగతి

- తొలి ప్రభుత్వ బంగారు గని ప్రారంభిస్తూ బుర్కినా ఫాసో మంత్రి గౌబా

ఒగాడుగు : గనులు ప్రభుత్వరంగంలో ఉంటేనే దేశ పురోగతి సాధ్యమవుతుందని బుర్కినా ఫాసో ఇంధన, గనులు, క్వారీల శాఖా మంత్రి యాకూబా జాబ్రే గౌబా అన్నారు. ఆఫ్రికా దేశమైన బుర్కినా ఫాసో బంగారు గనులను స్వాధీనం చేసుకోవాలనే సంచలన నిర్ణయం తీసుకుంది. ఈ క్రమంలో తొలి ప్రయత్నంగా గురువారం జరిగిన క్యాబినెట్ సమావేశంలో ప్రభుత్వ సంస్థ (ఎస్‌ఒపిఎఎంఐబి)కు మైనింగ్‌‌కు అనుమతిస్తూ ఉత్తర్వులు జారీ చేసింది. ఈ సందర్భంగా ఇంధన, గనులు, క్వారీల శాఖా మంత్రి యాకూబా జాబ్రే గౌబా మాట్లాడుతూ, ఈ ప్రాజెక్ట్ బుర్కినా ఫాసో మైనింగ్ విధానంలో ఒక ప్రధాన మార్పును తీసుకువస్తుందని, దీంతో ప్రభుత్వం ప్రైవేట్ కాంట్రాక్టుదారులపై ఆధారపడకుండా ప్రత్యక్ష పారిశ్రామిక నిర్వాహకురాలిగా మారుతుందని తెలిపారు. ఈ సహజ వనరులను ప్రభుత్వ నియంత్రించేందుకు, ఆర్థిక సార్వభౌమాధికారాన్ని బలోపేతం చేసుకునే దిశగా బుర్కినా ఫాసో ముందడుగు వేసిందని పలువురు భావిస్తున్నారు. యాడ్గా ప్రాంతంలోని యాకో మున్సిపాలిటీలో వున్న ఈ గని కార్యకలాపాలను ప్రభుత్వ రంగ సంస్థ అయిన ఎస్‌ఒపిఎఎంఐబి నిర్వహిస్తుంది. 15 ఏళ్ల కాలంలో 10.77 మిలియన్ల టన్నుల ఖనిజం నుండి 7.27 టన్నుల బంగారాన్ని వెలికితీయడమే లక్ష్యమని అధికారులు ప్రకటించారు. ఈ ప్రాజెక్టుతో ప్రత్యక్షంగా, పరోక్షంగా 12 వేలకు పైగా ఉద్యోగాలు లభిస్తాయని, విదేశీ మారకద్రవ్యం ఆర్జించడానికి దోహదపడుతుందని సంస్థ అధికారులు ప్రకటించారు. ప్రభుత్వం తెలిపిన వివరాల ప్రకారం, ఈ ప్రాజెక్టుకు సుమారు 39 మిలియన్ల అమెరికన్ డాలర్లు పెట్టుబడి అవసరం కాగా, డివిడెండ్లను మినహాయించి, దీని ద్వారా దాదాపు 66 మిలియన్ల అమెరికా డాలర్ల ఆదాయం సమకూరుతుందని అంచనా. బుర్కినా ఫాసోకు ప్రధాన ఎగుమతుల్లో బంగారం కీలకమైంది. ఈ బంగారు గనులపై సామ్రాజ్యవాద శక్తుల ప్రాబల్యం పెరిగిపోతోంది. వ్యూహాత్మక పరిశ్రమల్లో ప్రభుత్వ పాత్రను పెంచడానికి ఇటీవల కాలంలో అధ్యక్షుడు ఇబ్రహీం ట్రారోర్‌ కృషి చేస్తున్నారు. అందులో భాగంగానే ఈ చర్యలను తీసుకుంటున్నారు. పొరుగు దేశాలైన మాలి, నైజర్‌ ‌దేశాలతో పాటూ బుర్కినాఫాసో కూడా ఇటీవల వ్యూహాత్మక ఖనిజ వనరులపై ప్రభుత్వ నియంత్రణను పెంచుతుంది. బంగారం ఉత్పత్తి నుండి ప్రధానంగా లభించే ప్రయోజనాలు దేశాభివృద్ధికి దోహదపడేలా చర్యలు తీసుకుంటోంది.