పర్షియన్ గల్ఫ్‌లో భారతీయ నావికులున్న నౌకపై క్షిపణి దాడి

- నలుగురికి గాయాలు

న్యూఢిల్లీ: పర్షియన్ గల్ఫ్‌లో ప్రయాణిస్తున్న లైబీరియా జెండా కలిగిన 'ఎం.టి. ఫుజైరా ఎనర్జీ' నౌకపై నవంబర్ 10న క్షిపణి దాడి జరిగింది. ఈ నౌకలో ఆరుగురు భారతీయ నావికులు సహా మొత్తం 24 మంది సిబ్బంది ఉన్నారు. ఈ ఘటనలో నలుగురు సిబ్బంది గాయపడ్డారు. వీరిలో ఒక భారతీయుడికి స్వల్ప గాయాలయ్యాయి. అతడిని తదుపరి వైద్య పరీక్షల కోసం సురక్షితంగా ఒడ్డుకు తరలించారు. మిగిలిన 20 మంది సిబ్బంది సురక్షితంగా ఉన్నారు. వీరిలో ఐదుగురు భారతీయ నావికులు కూడా ఉన్నారు. ఈ ఘటనపై కేంద్ర ప్రభుత్వం పరిస్థితిని నిశితంగా పర్యవేక్షిస్తోందని కేంద్ర ఓడరేవులు, నౌకాయానం, జలమార్గాల శాఖ మంత్రి సర్బానంద సోనోవాల్ తెలిపారు. నావికులందరి భద్రత, వైద్య సంరక్షణ, క్షేమం కోసం ప్రభుత్వం నౌక యాజమాన్య సంస్థతో నిరంతరం సంప్రదింపులు జరుపుతోందని వెల్లడించారు.