బిజినెస్ : భారతీయ స్టాక్ మార్కెట్లు సోమవారం భారీ లాభాలతో కొనసాగుతున్నాయి. అమెరికా-ఇరాన్ మధ్య యుద్ధ విరమణకు సంబంధించిన ప్రాథమిక ఒప్పందం కుదిరిందని, హర్ముజ్ జలసంధి త్వరలోనే తిరిగి తెరుచుకోనున్నదని అమెరికా అధ్యక్షుడు డొనాల్డ్ ట్రంప్ ప్రకటించడం మార్కెట్లకు ఊతమిచ్చింది. ఈ ప్రకటనతో అంతర్జాతీయంగా ముడి చమురు ధరలు తగ్గుముఖం పట్టడంతో పెట్టుబడిదారుల్లో సానుకూల భావన నెలకొంది.
అమెరికా, ఇరాన్ ప్రతినిధులు శుక్రవారం స్విట్జర్లాండ్లో జరిగిన ప్రత్యక్ష చర్చల్లో ఒక ప్రాథమిక ఒప్పందానికి వచ్చినట్లు ట్రంప్ ఆదివారం సాయంత్రం తన ట్రూత్ సోషల్ వేదిక ద్వారా వెల్లడించారు. ఈ శాంతి ఒప్పందంపై జూన్ 19న స్విట్జర్లాండ్లో అధికారిక సంతకాలు జరగనున్నట్లు ఆయన తెలిపారు. గత 107 రోజులుగా కొనసాగుతున్న అమెరికా-ఇరాన్ యుద్ధానికి ముగింపు పలికే దిశగా ఈ పరిణామం సాగుతోందని పేర్కొన్నారు. ఈ పరిణామాల నేపథ్యంలో దేశీయ మార్కెట్లు బలంగా పుంజుకున్నాయి. ఉదయం 11 గంటల సమయంలో సెన్సెక్స్ 1,270.75 పాయింట్లు పెరిగి 76,798.70 వద్ద ట్రేడవుతుండగా, నిఫ్టీ 383.05 పాయింట్లు లాభపడి 24,005.95 వద్ద కొనసాగింది.
విస్తృత మార్కెట్లలో కూడా కొనుగోళ్లు జోరందుకున్నాయి. నిఫ్టీ స్మాల్క్యాప్-100 సూచీ 1.62 శాతం, నిఫ్టీ మిడ్క్యాప్-100 సూచీ 1.43 శాతం మేర పెరిగాయి. బ్యాంకింగ్ రంగంలో HDFC Bank షేరు దాదాపు 2 శాతం లాభపడింది. ఎన్ఆర్ఐ డిపాజిట్ పథకాలకు సంబంధించి ఆర్బీఐ చర్యలు బ్యాంకుకు దీర్ఘకాలంలో అనుకూలంగా ఉంటాయని, విదేశీ కరెన్సీ డిపాజిట్లను ఆకర్షించడంతో పాటు ద్రవ్యతను మెరుగుపరచి మార్జిన్ ఒత్తిడిని తగ్గించే అవకాశముందని నోమురా విశ్లేషించింది.
అలాగే పశ్చిమాసియా నుంచి గణనీయమైన ఆదాయం పొందుతున్న Larsen & Toubro షేర్లు 3.2 శాతం వరకు ఎగిశాయి. మరోవైపు ఆయిల్ మార్కెటింగ్ కంపెనీలు, టైర్ తయారీ సంస్థలు, పెయింట్ కంపెనీలు, విమానయాన రంగానికి చెందిన షేర్లు కూడా లాభపడ్డాయి. విదేశీ మారక మార్కెట్లో కూడా రూపాయి బలపడింది. ట్రంప్ ప్రకటన అనంతరం డాలర్తో పోలిస్తే రూపాయి విలువ 58 పైసలు పెరిగి 94.60కు చేరుకుంది. అమెరికా డాలర్ బలహీనపడటం రూపాయికి మద్దతుగా నిలిచింది.
కామెంట్లు (0)