పూర్తయిన జ్యోతుల పాపారావు సాగునీటి పథకం పనులు

ప్రజాశక్తి - జగ్గంపేట : మండలంలోని మామిడాడ వద్ద ఏర్పాటు చేసిన జ్యోతుల పాపారావు సాగునీటి పథకం పనులు పూర్తి అయ్యాయని జగ్గంపేట ఎంఎల్ఎ జ్యోతుల నెహ్రు పేర్కొన్నారు. గురువారం ఆ పనులను రైతులతో కలిసి పరిశీలించారు. అనంతరం ఆయన మాట్లాడుతూ.. మామిడాడ, ఇర్రిపాక , మర్రిపాక, గొల్లలగుంట, నరేంద్రపట్నం గ్రామాల రైతుల దశాబ్దాల సాగునీటి కష్టాలు తీర్చేందుకు రూ.3.50 లక్షలతో ఈ పథకం పనులు పూర్తి చేశామని అన్నారు. కాలువలు, మోటార్లు, పైపులైన్ల పనులన్నీ వంద శాతం పూర్తయ్యాయని, ట్రయల్ రన్ కూడా విజయవంతమైందని తెలిపారు. తొందరలోనే ప్రారంభించి నీళ్లు విడుదల చేస్తామని అన్నారు. ఈ కార్యక్రమంలో రాష్ట్ర ఆర్యవైశ్య డైరెక్టర్ కొత్తకొండ బాబు, క్లస్టర్ ఇంచార్జి బస్వా చినబాబు, మార్కెట్ కమిటీ డైరెక్టర్ బోదిరెడ్ల సుబ్బారావు, నీటి సంఘం చైర్మన్ జ్యోతుల ఈశ్వరరావు, జ్యోతుల సత్యమూర్తి, మామిడాడ, ఇర్రిపాక గ్రామాల రైతులు, కూటమి నాయకులు, అధికారులు పాల్గొన్నారు.