ఇంటర్నెట్ : ప్రపంచ వేదికలపై తమ డాన్స్ ప్రదర్శనతో ఆకట్టుకుంటున్న ఉగాండా నృత్య బృందం 'గెట్టో కిడ్స్' మరో ఘనత సాధించనుంది. జూలై 19న న్యూజెర్సీలోని మెట్లైఫ్ స్టేడియంలో జరిగే ఫిఫా ప్రపంచ కప్ ఫైనల్ హాఫ్టైమ్ షోలో తనతో కలిసి ప్రదర్శన ఇవ్వడానికి నైజీరియన్ పాప్ గాయని షకీరా 'గెట్టో కిడ్స్'ను ఆహ్వానించింది. ఫిఫా చరిత్రలోనే మొట్టమొదటి సూపర్ బౌల్ తరహా హాఫ్టైమ్ షో జరగనుంది. బర్నా బాయ్తో కలిసి తాను రికార్డ్ చేసిన, 2026 ప్రపంచ కప్ అధికారిక థీమ్ సాంగ్ అయిన 'డై డై' పాటకు గెట్టో కిడ్స్ చేసిన నృత్య వీడియోను చూసిన తర్వాత షకీరా వారిని ఎంపిక చేసుకుంది. ఈ పాటకు షకీరాతో కలిసి పిల్లలు నృత్యం చేస్తున్న వీడియోకు విశేష ఆదరణ లభించింది.
2013లో ప్రారంభమైన గెట్టో కిడ్స్ బృందం వెనుక ఓ భావోద్వేగ కథ ఉంది. ఈ బాలల నృత్య బృందం ఉగాండా రాజధాని కంపాలాలోని కట్వే టౌన్షిప్ వీధుల్లో నృత్యం చేస్తూ తమ ప్రస్థానాన్ని ప్రారంభించింది. ప్రస్తుతం సుమారు 60 మంది సభ్యులతో కొనసాగుతున్న ఈ బృందంలో చాలా మంది అనాథలు, తీవ్రమైన పేదరికాన్ని ఎదుర్కొన్న పిల్లలు, వీధుల్లో పెరిగినవారే. వారు ఒకరికొకరు ఒక కుటుంబంలా కలిసి జీవిస్తారు. అయితే నృత్యం వారి జీవితాలను మార్చేసింది. ప్రపంచకప్ అధికారిక గీతంగా నిలిచిన 'డై డై' పాటకు పిల్లలు చేసిన నృత్య వీడియో చూసిన తర్వాత షకీరా స్వయంగా వారిని ఎంపిక చేసుకుంది. ఇప్పటికే వారు మొరాకోలో జరిగిన కాన్ఫెడరేషన్ ఆఫ్ ఆఫ్రికన్ ఫుట్బాల్ అవార్డ్స్, 'బ్రిటన్స్ గాట్ టాలెంట్' టీవీ షో మరియు ఖతార్లో జరిగిన 2022 ప్రపంచ కప్లో ఇచ్చిన ప్రదర్శనలు ప్రపంచ దృష్టిని ఆకర్షించాయి. ఈ పిల్లలకు నృత్యం కేవలం కళ మాత్రమే కాదు, జీవనాధారం కూడా. ప్రదర్శనల ద్వారా వచ్చే ఆదాయంతో పాఠశాల ఫీజులు, దుస్తులు, వైద్య ఖర్చులు, రోజువారీ అవసరాలను తీర్చుకుంటున్నారు.
ఉగాండా మరియు పొరుగున ఉన్న డెమోక్రటిక్ రిపబ్లిక్ ఆఫ్ కాంగోలో ఎబోలా వ్యాప్తి కారణంగా అమెరికాకు ప్రయాణ ఆంక్షలు విధించవచ్చనే భయాలు ఉన్నాయి. అయినప్పటికీ, ఈ బృందం షకీరా ఆహ్వానం కోసం ఎదురుచూస్తోంది. ప్రపంచ కప్ సంగీతంతో అత్యంత సన్నిహితంగా ముడిపడి ఉన్న కళాకారిణి షకీరా. 2010లో ఆమె దక్షిణాఫ్రికా బ్యాండ్ ఫ్రెష్లీ గ్రౌండ్తో కలిసి పాడిన "వాకా వాకా", ప్రపంచ కప్ చరిత్రలో అత్యధికంగా అమ్ముడైన పాటలలో ఒకటి. ఇప్పుడు, 16 సంవత్సరాల తర్వాత, "డై డై" విడుదలైంది మరియు అభిమానులు ప్రపంచ కప్ పాటలకు గొంతు కలిపి పాడుతున్నారు.
కామెంట్లు (0)