పాలెంపల్లె బైపాస్‌పై ఘోర ప్రమాదం..ముగ్గురు మృతి

ప్రజాశక్తి-కడప : కడప నగర పరిధిలోని పాలెంపల్లె బైపాస్‌పై ఘోర ప్రమాదం చోటు చేసుకుంది. శుక్రవారం రాత్రి రెండు కార్లు ఎదురెదురుగా ఢీకొన్న ఘటనలో ముగ్గురు వ్యక్తులు అక్కడికక్కడే మృతి చెందారు. మరో ముగ్గురు తీవ్ర గాయాలయ్యాయి. ప్రమాదంపై సమాచారం అందుకున్న పోలీసులు, అత్యవసర సేవల సిబ్బంది వెంటనే ఘటనా స్థలానికి చేరుకుని సహాయక చర్యలు చేపట్టారు. క్షతగాత్రులను మెరుగైన చికిత్స నిమిత్తం కడపలోని రిమ్స్ ఆసుపత్రికి తరలించారు. మృతదేహాలను పోస్టుమార్టం నిమిత్తం మార్చురీకి పంపారు. ఈ ప్రమాదం కారణంగా ఆ మార్గంలో కొద్దిసేపు ట్రాఫిక్‌కు అంతరాయం ఏర్పడింది. పోలీసులు కేసు నమోదు చేసి ప్రమాదానికి గల కారణాలపై దర్యాప్తు ప్రారంభించారు. అతివేగం, నిర్లక్ష్యపు డ్రైవింగ్ లేదా ఇతర సాంకేతిక కారణాల వల్ల ఈ ప్రమాదం జరిగిందా అనే కోణంలో ఆరా తీస్తున్నారు. మృతులు, గాయపడిన వారి పూర్తి వివరాలను పోలీసులు సేకరిస్తున్నారు.