పాకిస్థాన్‌ భూకంపం.. రిక్టర్‌ స్కేలుపై 5.4 తీవ్రత నమోదు

లాహోర్‌:పాకిస్థాన్‌లో శనివారం భారీ భూకంపం సంభవించింది.ఈ భూకంప తీవ్రత రిక్టర్‌ స్కేలుపై 5.4గా నమోదైనట్లు భూగర్భ శాస్త్రవేత్తలు వెల్లడించారు. యూరోపియన్‌ మెడిటేరియన్‌ సీస్మలాజికల్‌ సెంటర్‌ (EMSC) తెలిపిన వివరాల ప్రకారం.. భూ అంతర్భాగంలో 35 కిలోమీటర్ల లోతులో ఈ భూకంప కేంద్రం ఉన్నట్లు గుర్తించారు. భూప్రకంపనల ధాటికి ఇళ్లు, కార్యాలయాల్లోని వస్తువులు ఒక్కసారిగా కదలడంతో ప్రజలు ప్రాణాలు గుప్పిట్లో పెట్టుకుని భవనాల నుంచి బహిరంగ ప్రదేశాల్లోకి పరుగులు తీశారు. ఈ భూకంపం కారణంగా సంభవించిన ఆస్తి, ప్రాణ నష్టానికి సంబంధించిన పూర్తి వివరాలు ఇంకా తెలియరాలేదని, ప్రభావిత ప్రాంతాల్లో అధికారులు నష్ట తీవ్రతను అంచనా వేస్తున్నారని స్థానిక మీడియా వర్గాలు పేర్కొన్నాయి. పూర్తి సమాచారం ఇంకా అందాల్సి ఉంది.