తిరువనంతపురం : 18వ అంతర్జాతీయ డాక్యుమెంటరీ, షార్ట్ ఫిల్మ్ ఫెస్టివల్ (IDSFFK) ప్రారంభమైనప్పటికీ, కేరళ చలచిత్ర అకాడమీకి ఛైర్మన్ మాత్రం లేడు. చైర్మన్, కార్యదర్శి, జనరల్ కౌన్సిల్ లేకపోవడంతో అకాడమీ కార్యకలాపాలు తీవ్రంగా దెబ్బతిన్నాయి. సాధారణంగా జూన్ లేదా జూలై నెలల్లో జరగాల్సిన ఈ చిత్రోత్సవం, ఈ పాలనాపరమైన స్థబ్దత వల్లే రెండు నెలలు ఆలస్యంగా ప్రారంభమైంది. అయినప్పటికీ, కొత్త చైర్మన్ను నియమించడంలో యుడిఎఫ్ (UDF) ప్రభుత్వం విఫలమైందనే విమర్శలు వ్యక్తమవుతున్నాయి.
శుక్రవారం సాయంత్రం ఈ చిత్రోత్సవ అధికారిక ప్రారంభోత్సవం జరగనుంది. అయితే, షార్ట్ ఫిల్మ్ ఫెస్టివల్ ముగిసేలోపు చైర్మన్ను నియమించకపోతే, చరిత్రలోనే తొలిసారిగా చైర్మన్ పేరు గానీ, సంతకం గానీ లేకుండా సర్టిఫికెట్లను విజేతలకు బహుకరించాల్సిన దుస్థితి ప్రభుత్వానికి దాపురిస్తుందని విశ్లేషకులు హెచ్చరిస్తున్నారు.
యుడిఎఫ్ ప్రభుత్వం అధికారంలోకి వచ్చి నాలుగు నెలలు గడుస్తున్నా, సాంస్కృతిక రంగానికి చెందిన ముఖ్య సంస్థలు పాలకులు లేక మూగబోయాయి. కేవలం చలచిత్ర అకాడమీ మాత్రమే కాకుండా.. కేరళ సాహిత్య అకాడమీ, సంగీత నాటక అకాడమీ, లలితకళ అకాడమీ, కేరళ కళామండలం డీమ్డ్ యూనివర్సిటీ, బాలసాహిత్య ఇన్స్టిట్యూట్, రాష్ట్ర చలనచిత్రాభివృద్ధి సంస్థ (KSFDC)తో సహా దాదాపు 30కి పైగా సంస్థలు నాథుడు లేని నిలయాలుగా మారాయి.
కాంగ్రెస్, యుడిఎఫ్ భాగస్వామ్య పక్షాల మధ్య పదవుల పంపకాలపై విపరీతమైన పోటీ, నెట్టివేతలు పెరగడమే ఈ సంక్షోభానికి ప్రధాన కారణమని తెలుస్తోంది. నామినేటెడ్ పదవుల కోసం కాంగ్రెస్ అనుకూల నేతలు క్యూ కడుతున్నారు. పాలకవర్గాలు లేకపోవడంతో డైలీ ఉద్యోగులకు తాత్కాలిక నిర్వహణ బాధ్యతలు అప్పగించినప్పటికీ, వారు ఎలాంటి విధానపరమైన నిర్ణయాలు గానీ, దీర్ఘకాలిక ప్రణాళికలు గానీ చేయలేకపోతున్నారు.
కామెంట్లు (0)