సోమవారం ప్రకటన చేసే అవకాశం ఉందన్న మీడియా కథనాలు
లండన్: బ్రిటన్ ప్రధానమంత్రి కీర్ స్టార్మర్ తన పదవికి రాజీనామా చేసే అవకాశం ఉందని బ్రిటిష్ మీడియా కథనాలు వెల్లడించాయి. అధికార లేబర్ పార్టీలో పెరుగుతున్న అంతర్గత విభేదాలు, నాయకత్వంపై తీవ్ర అసంతృప్తి నేపథ్యంలో ఆయన సోమవారం తన భవిష్యత్పై కీలక ప్రకటన చేయవచ్చని వార్తలు వెలువడ్డాయి. అయితే దీనిపై ఇప్పటివరకు అధికారిక ధృవీకరణ వెలువడలేదు. గత కొంతకాలంగా లేబర్ పార్టీలో కీర్ స్టార్మర్ నాయకత్వంపై అసంతృప్తి పెరుగుతోంది. ఇటీవల జరిగిన మేకర్ఫీల్డ్ ఉపఎన్నికల్లో ఆండీ బర్న్హామ్ విజయం సాధించడం ఆయనకు పార్టీ నాయకత్వ సవాలు విసిరే అవకాశాన్ని మరింత బలపరిచింది. 2024లో లేబర్ పార్టీని ఘన విజయంతో అధికారంలోకి తీసుకువచ్చినప్పటికీ, అనంతరం పలు విధాన మార్పులు, ప్రజాదరణ తగ్గడం, అంతర్గత విభేదాలు స్టార్మర్కు ప్రతికూలంగా మారాయి. 100 మందికి పైగా ఎంపీలు ఆయన వైదొలగాలని లేదా స్పష్టమైన కాలపట్టిక ప్రకటించాలని కోరుతున్నట్లు నివేదికలు చెబుతున్నాయి. ప్రజలకు ఇచ్చిన అనేక కీలక హామీల నుండి స్టార్మర్ వెనక్కి తగ్గారు. ఆయన ప్రభుత్వం ఒక నెల వ్యవధిలో మూడు ప్రధాన విధానాలను సవరించింది. ఇది పార్టీలోని వామపక్ష వర్గానికి, సాధారణ ఓటర్లకు ఆగ్రహం తెప్పించింది. దీనివల్ల ప్రజలు మోసపోయామనే భావనకు లోనయ్యారు.
బ్రిటన్ లో గత పదేళ్లలో ఆరుగురు ప్రధానమంత్రులు పనిచేశారు. ఒకవేళ కీర్ స్టార్మర్ పదవి నుంచి వైదొలిగితే, ఆయన దేశం చూసిన ఏడవ ప్రధానమంత్రి అవుతారు. రెండు శతాబ్దాల బ్రిటిష్ చరిత్రలో ఇంత వేగంగా ప్రధానమంత్రి మారడం ఎప్పుడూ జరగలేదని మీడియా కథనాలు పేర్కొన్నాయి.
కామెంట్లు (0)