IND Vs NZ :భారత క్రికెట్ జట్టులో ప్రస్తుతం అనుభవం కలిగిన బౌలర్లు తక్కువగా ఉన్నారని హెడ్ కోచ్ గౌతమ్ గంభీర్ అభిప్రాయపడ్డారు. న్యూజిలాండ్‌తో జరగనున్న వన్డే సిరీస్‌లో భారత జట్టు విజయం సాధిస్తే ఆ ఘనత బౌలర్లకే దక్కాలని ఆయన వ్యాఖ్యానించారు. విదేశీ గడ్డపై వన్డే, టెస్టు సిరీస్‌లు గెలవడంలో బౌలర్ల పాత్ర అత్యంత కీలకమని పేర్కొన్నారు. జట్టు విజయం సాధించినప్పుడు బ్యాటర్ల ప్రదర్శన కంటే బౌలర్ల కృషికి ఎక్కువ గుర్తింపు ఇవ్వాలని అన్నారు.
ప్రస్తుతం మహ్మద్ సిరాజ్ (51 వన్డేలు), అర్ష్‌దీప్ సింగ్ (18 వన్డేలు) భారత బౌలింగ్ విభాగానికి నాయకత్వం వహిస్తున్నారు. ఈ నేపథ్యంలో అనుభవం తక్కువగా ఉన్న బౌలింగ్ దళం రానున్న సిరీస్‌లో ఎలా రాణిస్తుందన్నది ఆసక్తికరంగా మారింది.
న్యూజిలాండ్‌తో ఐదు వన్డేల సిరీస్ నవంబర్ 4 నుంచి ప్రారంభం కానుంది. తొలి మ్యాచ్ ఆక్లాండ్‌లోని ఈడెన్ పార్క్‌లో భారత కాలమానం ప్రకారం ఉదయం 7.30 గంటలకు జరగనుంది. రెండో వన్డే నవంబర్ 7న వెల్లింగ్టన్‌లో, మూడో మ్యాచ్ నవంబర్ 10న హామిల్టన్‌లో నిర్వహించనున్నారు. చివరి రెండు వన్డేలు నవంబర్ 13, 15 తేదీల్లో టౌరంగాలోని బే ఓవల్ వేదికగా జరగనున్నాయి.
తొలి మూడు వన్డేలకు శుభ్‌మన్ గిల్ కెప్టెన్‌గా, శ్రేయస్ అయ్యర్ వైస్ కెప్టెన్‌గా వ్యవహరించనున్నారు. రోహిత్ శర్మ, విరాట్ కోహ్లీ, కేఎల్ రాహుల్, అక్షర్ పటేల్, ఇషాన్ కిషన్, నమన్ ధీర్, కుల్దీప్ యాదవ్‌లకు కూడా జట్టులో చోటు కల్పించారు. చివరి రెండు వన్డేలకు శ్రేయస్ అయ్యర్ కెప్టెన్‌గా బాధ్యతలు చేపట్టనుండగా, ఆ మ్యాచ్‌ల కోసం తిలక్ వర్మ జట్టులో చేరనున్నారు. మరోవైపు న్యూజిలాండ్ జట్టుకు మిచెల్ సాంట్నర్ సారథ్యం వహించనున్నారు.
కామెంట్‌లు (0)