విబి గ్రామ్‌ ‌జి డైరెక్టర్‌గా షన్ముఖ్‌కుమార్

ప్రజాశక్తి-అమరావతి బ్యూరో : పంచాయతీరాజ్‌, గ్రామీణాభివృద్ధి శాఖ కమిషనర్ కార్యాలయంలో ఎంజిఎన్‌ఆర్‌ఇజిఎస్‌ డైరెక్టర్ పోస్టును విబి గ్రామ్‌ ‌జి డైరెక్టర్‌‌గా ప్రభుత్వం మార్పు చేసింది. ఈ పోస్టులో ప్రస్తుతం పనిచేస్తున్న ఐఎఫ్‌ఎస్ అధికారి వైవికె షన్ముఖ్‌కుమార్‌‌ను మరో ఏడాది పాటు కొనసాగించేందుకు అనుమతి ఇచ్చింది. ఈ మేరకు సాధారణ పరిపాలన శాఖ శుక్రవారం ఉత్తర్వులు జారీ చేసింది. ఈ ఏడాది ఆగస్టు 30 నుంచి వచ్చే ఏడాది ఆగస్టు 29 వరకు లేదా పోస్టు అవసరం లేని పరిస్థితి ఏర్పడే వరకు, ఈ రెండింటిలో ఏది ముందైతే అప్పటి వరకు పోస్టు కొనసాగనుందని ఉత్తర్వుల్లో పేర్కొంది. విబి గ్రామ్‌‌ జి జూలై 1 నుంచి అమల్లోకి వచ్చిన నేపథ్యంలో డైరెక్టర్ పోస్టును కొనసాగించడం అవసరమని పంచాయతీరాజ్, గ్రామీణాభివృద్ధి శాఖ ప్రభుత్వానికి ప్రతిపాదించింది. ఈ పథకం అమలును పర్యవేక్షించడం, తనిఖీలు నిర్వహించడం, గ్రామీణాభివృద్ధి కమిషనర్‌కు సహకరించడం వంటి బాధ్యతల్లో డైరెక్టర్ కీలక పాత్ర పోషించనున్నారు. అలాగే రాష్ట్ర గ్రామీణ ఉపాధి హామీ మండలి, రాష్ట్రస్థాయి స్టీరింగ్ కమిటీలో డైరెక్టర్, ప్రత్యేక కమిషనర్ సభ్యుడిగా వ్యవహరించనున్నారు.