ఉదయం లేచినప్పటి నుంచి రాత్రి పడుకునే వరకు గృహిణులకు వంటగది పనులతో పాటు ఇంటి శుభ్రతను నిర్వహించడం చాలా కష్టంగా ఉంటుంది. ఒక్కోసారి చాలా సమయం కూడా పడుతుంది. కొన్ని చిన్న చిన్న చిట్కాలు పాటిస్తే, ఆ పని భారాన్ని, సమయాన్ని తగ్గించుకోవచ్చు.
ఆహార పదార్థాల తాజాదనం: పచ్చిమిరపకాయలు త్వరగా పాడవకుండా, ఎరుపు రంగులోకి మారకుండా ఉండాలంటే, నిల్వ చేసే సీసాలో కాసింత పసుపు వేయాలి. అలాగే, మిరపకాయల తొడిమలు తీసి ఫ్రిజ్లో ఉంచితే ఎక్కువ రోజులు తాజాగా ఉంటాయి.
చింతపండు రసం: సమయం తక్కువగా ఉన్నప్పుడు చింతపండును సాధారణ నీళ్లకు బదులుగా కాస్త వేడి నీళ్లలో నానబెడితే, దాని నుంచి గుజ్జు లేదా రసం త్వరగా, సులభంగా వస్తుంది.
దోసెల తయారీ: దోసెల పిండి రుబ్బే సమయంలో కొద్దిగా సగ్గుబియ్యం కలిపితే, దోసెలు పెనానికి అతుక్కోకుండా, విరిగిపోకుండా పల్చగా వస్తాయి. పెనానికి పిండి అతుక్కుపోతుంటే, సగం కోసిన ఉల్లిపాయ లేదా వంకాయ ముక్కతో పెనంపై రుద్దాలి.
కూరగాయలు కోసేటప్పుడు: కాకరకాయ చేదు తగ్గాలంటే, చెక్కు తీసాక కొద్దిగా ఉప్పు రుద్ది పక్కన పెట్టాలి. ఉల్లిపాయలు కోసేటప్పుడు కన్నీళ్లు రాకుండా ఉండటానికి, కోయడానికి 10 నిమిషాల ముందు వాటిని ఫ్రిజ్లో ఉంచాలి.
పాలు, నెయ్యి సంరక్షణ: పాలపై మందపాటి మీగడ రావడానికి, పాలు మరిగాక పూర్తి మూత పెట్టకుండా చిల్లుల మూత పెట్టి చల్లారనివ్వాలి. నెయ్యి కాచేటప్పుడు చివరి దశలో ఒక తమలపాకు లేదా కొద్దిగా కరివేపాకు వేస్తే, నెయ్యి మంచి సువాసనతో, పూసపూసగా మారుతుంది.
ఇంటి పరిశుభ్రత కోసం
క్రిమికీటకాల నివారణ: ఇంట్లోకి లేదా బయటి వర్షపు ప్రాంతాల నుంచి దోమలు, ఈగలు రాకుండా ఉండటానికి, సాయంత్రం వేళల్లో కర్పూరం వెలిగించడం లేదా వేపనూనె దీపం పెట్టాలి.
దుర్వాసనలు దూరం: డస్ట్బిన్ లేదా చెత్త డబ్బా అడుగున కొద్దిగా బేకింగ్ సోడా చల్లితే, చెత్త వల్ల వచ్చే దుర్వాసనలు రావు. పాదరక్షలు (షూస్) వాసన వస్తుంటే, వాటిలో కొద్దిగా వంటసోడా చల్లి ఉదయాన్నే దులిపితే వాసన పోతుంది.
మొక్కల సంరక్షణ: ఇంట్లో బియ్యం, పప్పులు లేదా కూరగాయలు కడిగిన నీటిని పారబోయకుండా, కుండీలలోని మొక్కలకు పోస్తే అవి సహజమైన పోషకాలను పొంది బలంగా పెరుగుతాయి.
కామెంట్లు (0)