సంగం వాగు సమీపంలో సంచరిస్తున్న పెద్దపులి

• పరిసర గ్రామాల ప్రజలు అప్రమత్తంగా ఉండాలని అటవీశాఖ హెచ్చరిక

ప్రజాశక్తి – ఏలూరు: ఏలూరు జిల్లా జీలుగుమిల్లి మండలం బొత్తప్పగూడెం సమీపంలోని సంగం వాగు పరిసరాల్లో పెద్దపులి సంచరిస్తున్నట్లు అటవీశాఖ అధికారులు తెలిపారు. జిల్లెళ్లగూడెం గ్రామ సమీపంలో గతంలో ఎద్దుపై దాడి చేసిన పెద్దపులి, తిరిగి ఆ కళేబరం వద్దకు వచ్చి ఆహారం తీసుకున్నట్లు గుర్తించారు. అనంతరం సంగం వాగు పరిసరాల్లో సంచరించి సమీప అటవీ ప్రాంతంలోకి వెళ్లినట్లు తెలిపారు.
పెద్దపులి కదలికల నేపథ్యంలో పరిసర గ్రామాల ప్రజలు అప్రమత్తంగా ఉండాలని అటవీశాఖ అధికారులు హెచ్చరించారు. ముఖ్యంగా రాత్రి వేళల్లో ఒంటరిగా బయటకు వెళ్లకుండా జాగ్రత్తలు తీసుకోవాలని, పశువుల విషయంలో అప్రమత్తంగా ఉండాలని సూచించారు.