మంత్రి పి. నారాయణ లండన్ పర్యటనకు అనుమతి

ప్రజాశక్తి-అమరావతి బ్యూరో : పురపాలక పరిపాలన, పట్టణాభివృద్ధి శాఖ మంత్రి పి. నారాయణ అధికారిక పర్యటన నిమిత్తం యునైటెడ్ కింగ్‌డమ్‌లోని లండన్ వెళ్లేందుకు ప్రభుత్వం అనుమతి మంజూరు చేసింది. ఈ మేరకు సాధారణ పరిపాలన శాఖ శుక్రవారం ఉత్తర్వులు జారీ చేసింది. ఉత్తర్వుల ప్రకారం.. మంత్రి పి. నారాయణ ఆగస్టు 10 నుంచి 14 వరకు లండన్‌లో అధికారిక పర్యటన చేపట్టనున్నారు. అయితే ఈ పర్యటనకు ముందు భారత విదేశాంగ మంత్రిత్వ శాఖతో పాటు ఇతర కేంద్ర ప్రభుత్వ శాఖల నుంచి అవసరమైన అనుమతులు, రాజకీయ అనుమతి తప్పనిసరిగా పొందాలని ఉత్తర్వుల్లో పేర్కొన్నారు. ఈ అధికారిక విదేశీ పర్యటనకు సంబంధించిన వ్యయాన్ని ఎపిసిఆర్‌‌డిఎ, ఎజిఐసిఎల్‌ ప్రాజెక్టుల కోసం మంజూరైన నిధుల నుంచి భరించనున్నట్లు ప్రభుత్వం తెలిపింది. మంత్రి పర్యటనకు సంబంధించిన తదుపరి చర్యలు చేపట్టాలని పురపాలక పరిపాలన, పట్టణాభివృద్ధి శాఖను ఆదేశించింది.