సుస్వర వాణి.. జానకి

పల్లవి: స్వరాల ద్వారం మూసుకున్నది

మౌనపు తీరం చేరుకున్నది

ఎక్కడో చెప్పు విభావరి

చేరుకుంటాము సరాసరి జానకి.. జానకి

కోట్ల స్వరాలు పొదువుకున్న

వరదాయినివి నీవు

సంగీతమే సన్నిధానంగా

తుంబుర తంబురవైనావు

జానకి.. జానకి

ఓ జానకి.. జానకి

చరణం 1

పాట పాటకో కోట కట్టావు

వేల భావాలు దాచిపెట్టావు

పాటల అక్షయపాత్రవయ్యావు

నామమాత్రనని చెప్పుకున్నావు

జానకి.. ఓ జానకి

చరణం 2

భాష నీకెపుడూ వాహికయే

పాటకు నీవు నాయికవే

సంగీతార్చన మంత్రపుష్పమై

దిగంతాల ఆరాధనవే

జానకి.. ఓ జానకి

చరణం 3

నీకు పాడిన పాటలన్నీ

జీవనదులలో క్షీరధారలే

నవరసాలు నీ నవప్రాణాలై

సకల భువనాల స్వరపేటికలే

జానకి..... ఓ జానకి

చరణం 4

పలుకలేని పలుకే లేదని – నీ

పకపక సైతం పులకితమాయెను

విషాదమైనా ప్రమోదమైనా

స్వర తూణీరపు ధనుర్ధారివి

జానకి..... ఓ జానకి

చరణం 5

పాటకు నీవు రూపధారివి

మనోరంజక సంజీవనివి

సప్తస్వర పుంజానివి

సంధ్యా సుందర కెంజాయివి

జానకి..... ఓ జానకి

చరణం 6

పాడాల్సిది ఏమీ లేదని

నీ పాటలన్నీ చిరంజీవులని

నీ స్వరసంపద మాకిచ్చేసి

వినమ్రమైతివి విరాగినిలా

జానకి..... ఓ జానకి

– దేవేంద్ర