ఎగిరిపోయిన విమానం!

విశాఖ మహానగరానికి
విశాల సాగరాన్ని విడిచిపెట్టి
వీడిపోయింది విమానాశ్రయం
వాలింది భోగాపురాన వైభోగంగా!
​
వాల్తేరు రైలు కూత దువ్వాడకు చేరుతోంది
రాజకీయ రణతంత్రంలో
ఉక్కు నగరానికి దిక్కు తోచకుండా పోతోంది
​విభజిత ఆంధ్రాకు పెట్టుబడుల రాబడులకు,
విశ్వ విపణిలో అంగడి సరుకై మిగిలింది!
​
రాజధాని మాట అటుంచుగాని
రాతి కొండలే తరగిపోతున్నాయి
ఉక్కు కండలే కరగిపోతున్నాయి
రాజభవనాలే పెరిగిపోతున్నాయి
​
ఫార్మా సిటీల విషవాయువులు
ఊపిరితిత్తులను ఉడికిస్తుంటే
ఐటీ కొలువుల ఆశల దీపాలు
నిరుద్యోగ నిశ్శబ్దంలో ఆరిపోతుంటే
​మెట్రో కలలు కాగితాలకే పరిమితమై
రోడ్లపై ట్రాఫిక్‌ నరకం చూపుతుంటే...
​
నిలువెత్తు కొండలకు ధీటైన ఆత్మస్థైర్యంతో,
అంతులేని ఆవేదనను
సాగర గర్భంలో దాచుకుంటోంది
విశాఖ నగరం!
- బంధకవి శ్రీనివాస రామారావు
94406 59726