మహిళలపై నేరాల కేసుల్లో ప్రజాప్రతినిధులు

రెండో స్థానంలో ఎపి, బిజెపిలో 106 మంది
ఎడిఆర్‌ ‌నివేదిక వెల్లడి

న్యూఢిల్లీ : మహిళలపై నేరాలకు సంబంధించిన కేసులు ఉన్నట్లు ప్రకటించిన ప్రజాప్రతినిధుల సంఖ్యలో ఆంధ్రప్రదేశ్‌ దేశంలో రెండో స్థానంలో నిలిచింది. అసోసియేషన్‌ ఫర్‌ డెమోక్రటిక్‌ రిఫార్మ్స్‌ (ఎడిఆర్‌), నేషనల్‌ ఎలక్షన్‌ వాచ్‌ అక్టోబరు 23న విడుదల చేసిన నివేదిక ఈ విషయాన్ని వెల్లడించింది. ఎన్నికల సమయంలో ప్రజాప్రతినిధులు ఎన్నికల కమిషన్‌కు సమర్పించిన అఫిడవిట్ల ఆధారంగా ఈ నివేదిక రూపొందించారు. 2022 నుంచి 2026 మధ్య జరిగిన ఎన్నికలు, ఉప ఎన్నికల సందర్భంగా సమర్పించిన అఫిడవిట్లలోని వివరాలను పరిశీలించారు. మొత్తం 772 మంది సిట్టింగ్‌ ఎంపీలు, 4,109 మంది సిట్టింగ్‌ ఎమ్మెల్యేల అఫిడవిట్లను విశ్లేషించగా, 187 మంది ప్రజాప్రతినిధులు మహిళలపై నేరాలకు సంబంధించిన కేసులు ఉన్నట్లు ప్రకటించారు. వీరిలో 168 మంది ఎమ్మెల్యేలు, 19 మంది ఎంపిలు ఉన్నారు.

రాష్ట్రాల వారీగా...

రాష్ట్రాల వారీగా పశ్చిమబెంగాల్‌ 69 మందితో మొదటి స్థానంలో ఉండగా, ఆంధ్రప్రదేశ్‌ 22 మందితో రెండో స్థానంలో, ఒడిశా 17 మందితో మూడో స్థానంలో ఉన్నాయి. పశ్చిమ బెంగాల్‌లో 63 మంది ఎమ్మెల్యేలు, నలుగురు లోక్‌సభ సభ్యులు, ఇద్దరు రాజ్యసభ సభ్యులు ఈ తరహా కేసులు ఉన్నట్లు ప్రకటించారు. ఈ గణాంకాలు కేసులు ఉన్నట్లు అఫిడవిట్లలో చేసిన ప్రకటనల ఆధారంగా రూపొందించినవి. ఆరోపణలు ఎదుర్కొంటున్న వారంతా నేరాలు చేసినట్లు నిర్ధారణ అయినట్లు కాదు. దేశవ్యాప్తంగా 14 మంది సిట్టింగ్‌ ఎంపీలు, ఎమ్మెల్యేలు అత్యాచారానికి సంబంధించిన కేసులు ఉన్నట్లు తమ అఫిడవిట్లలో ప్రకటించారు. వీరిలో ఇద్దరు లోక్‌సభ సభ్యులు, 12 మంది ఎమ్మెల్యేలు ఉన్నారు. పార్టీ వారీగా బీజేపీకి చెందిన ఇద్దరు ఎమ్మెల్యేలు, ఇద్దరు ఎంపీలు, కాంగ్రెస్‌కు చెందిన నలుగురు ఎమ్మెల్యేలు ఈ తరహా కేసులు ఉన్నట్లు వెల్లడించారు. టీడీపీ, తృణమూల్‌ కాంగ్రెస్‌, బిజూ జనతాదళ్‌ (బీజేడీ), నేషనల్‌ పీపుల్స్‌ పార్టీ, భారత ఆదివాసీ పార్టీ, ఆల్‌ ఇండియా సెక్యులర్‌ ఫ్రంట్‌లకు చెందిన ఒక్కో ఎమ్మెల్యే కూడా అత్యాచారానికి సంబంధించిన కేసులు ఉన్నట్లు ప్రకటించారు.

బిజెపిలో అత్యధికులు

పార్టీల వారీగా చూస్తే మహిళలపై నేరాలకు సంబంధించిన కేసులు ఉన్నట్లు ప్రకటించిన ప్రజాప్రతినిధుల్లో బీజేపీకి చెందినవారు అత్యధికంగా ఉన్నారు. ఆ పార్టీకి చెందిన 95 మంది ఎమ్మెల్యేలు, 10 మంది లోక్‌సభ సభ్యులు, ఒక రాజ్యసభ సభ్యుడు కలిపి మొత్తం 106 మంది ఈ జాబితాలో ఉన్నారు. కాంగ్రెస్‌కు చెందిన 19 మంది ఎమ్మెల్యేలు, ఒక లోక్‌సభ సభ్యుడు కలిపి 20 మంది ఉన్నారు. టీడీపీకి చెందిన 17 మంది ఎమ్మెల్యేలు, ఒక రాజ్యసభ సభ్యుడు కలిపి 18 మంది ఈ తరహా కేసులు ఉన్నట్లు ప్రకటించారు. యాసిడ్‌ దాడులు, అత్యాచారం, మహిళల పట్ల అసభ్యంగా ప్రవర్తించడం, లైంగిక వేధింపులు, వివాహం చేసుకోవాలని బలవంతం చేయడం, అపహరణ, బెదిరింపులు, వెంటపడటం వంటి వివిధ నేరాలకు సంబంధించిన కేసులు ఈ నివేదిక పరిధిలోకి వచ్చాయి.

విచారణలో జాప్యం

నేరచరిత్ర ఉన్న అభ్యర్థులను ఎన్నికల్లో పోటీకి ఎంపిక చేసినప్పుడు, వారిని ఎంపిక చేయడానికి గల కారణాలను, వారి నేరచరిత్ర వివరాలను బహిరంగంగా వెల్లడించాలని రాజకీయ పార్టీలను సుప్రీంకోర్టు 2020 ఫిబ్రవరిలో ఆదేశించింది. అయితే అభ్యర్థుల నేరచరిత్రను, వారిని ఎంపిక చేయడానికి గల కారణాలను ప్రచురించడంలో రాజకీయ పార్టీలు కోర్టు ఆదేశాలను సరిగా పాటించడం లేదని ఎడిఆర్‌ తన నివేదికలో పేర్కొంది. నివేదికలో ప్రస్తావించిన కొన్ని అఫిడవిట్లలో అభియోగాలు ఇంకా నమోదు కాని కేసులు కూడా ఉన్నట్లు వెల్లడించింది. ప్రజాప్రతినిధులపై నమోదైన క్రిమినల్‌ కేసుల విచారణను నిర్ణీత కాలపరిమితిలో పూర్తి చేయాలని ఎడిఆర్‌ సిఫార్సు చేసింది.