న్యూఢిల్లీ : శ్రీలంకతో జరిగే రెండు మ్యాచ్ల టెస్ట్ సిరీస్కు భారత క్రికెట్ నియంత్రణ మండలి (బిసిసిఐ) మంగళవారం 15 మంది సభ్యులతో కూడిన భారత జట్టును ప్రకటించింది. యువ బ్యాటర్ శుభమన్ గిల్ సారథ్యంలో జట్టు బరిలోకి దిగనుండగా, సీనియర్ ఆటగాడు కేఎల్ రాహుల్కు వైస్ కెప్టెన్ బాధ్యతలు అప్పగించింది. గాయాలు, ఇతర కారణాలతో గత కొంతకాలంగా టెస్ట్ జట్టుకు దూరంగా ఉన్న స్టార్ పేసర్ జస్ప్రీత్ బుమ్రా, స్టార్ ఆల్రౌండర్ రవీంద్ర జడేజా మళ్లీ జట్టులో చోటు దక్కించుకున్నారు. అయితే బుమ్రాతో పాటు యువ బ్యాటర్ సాయి సుదర్శన్ ఎంపిక బిసిసిఐ సెంటర్ ఆఫ్ ఎక్సలెన్స్ (CoE) ఫిట్నెస్ క్లియరెన్స్కు లోబడి ఉంటుందని బోర్డు స్పష్టం చేసింది. ఫిట్నెస్ పరీక్షలో ఉత్తీర్ణులైన తర్వాతే వీరు మ్యాచ్లకు అందుబాటులో ఉంటారు. దేశవాళీ క్రికెట్లో ఇటీవల నిలకడైన ప్రదర్శనతో ఆకట్టుకున్న ఆల్రౌండర్ సరన్ష్ జైన్కు తొలిసారిగా భారత టెస్ట్ జట్టులో చోటు లభించింది. ఐసిసి వరల్డ్ టెస్ట్ ఛాంపియన్షిప్ (డబ్ల్యూటీసీ) సైకిల్లో భాగంగా నిర్వహిస్తున్న ఈ టెస్ట్ సిరీస్ ఆగస్టు 15 నుంచి 27 వరకు శ్రీలంకలో జరగనుంది.
భారత జట్టు : శుభమన్ గిల్ (కెప్టెన్), కేఎల్ రాహుల్ (వైస్ కెప్టెన్), యశస్వి జైస్వాల్, రిషబ్ పంత్ (వికెట్ కీపర్), సాయి సుదర్శన్, ధృవ్ జురెల్ (వికెట్ కీపర్), రవీంద్ర జడేజా, కుల్దీప్ యాదవ్, మానవ్ సుతార్, జస్ప్రీత్ బుమ్రా, మహ్మద్ సిరాజ్, ప్రసిద్ధ్ కృష్ణ, గుర్నూర్ బ్రార్, దేవదత్ పడిక్కల్, సరన్ష్ జైన్.
సిరీస్ షెడ్యూల్ :
మొదటి టెస్ట్ : ఆగస్టు 15–19 – గాలే ఇంటర్నేషనల్ స్టేడియం
రెండో టెస్ట్ : ఆగస్టు 23–27 – సింహళీస్ స్పోర్ట్స్ క్లబ్ (ఎస్ఎస్సీ), కొలంబో
కామెంట్లు (0)