Print Edition23న డిప్యూటీ మేయర్లు, వైస్‌ ఛైర్‌పర్సన్ల ఎన్నిక

ప్రజాశక్తి-అమరావతి బ్యూరో: రాష్ట్రంలోని 13 మున్సిపల్‌ కార్పొరేషన్లు, 87 మున్సిపల్, నగర పంచాయతీల్లో డిప్యూటీ మేయర్లు, వైస్‌ ఛైర్‌పర్సన్ల ఎన్నికలకు రాష్ట్ర ఎన్నికల సంఘం షెడ్యూల్‌ ఖరారు చేసింది. ఈ నెల 23న పరోక్ష పద్ధతిలో ఎన్నికలు నిర్వహించనున్నట్లు రాష్ట్ర ఎన్నికల కమిషనర్ (ఎస్‌ఈసీ) అనిల్ చంద్ర పునేఠా బుధవారం ప్రకటించారు. ఎన్నికైన మేయర్లు, ఛైర్‌పర్సన్లు, వార్డు సభ్యులకు ఈ నెల 18వ తేదీలోపు ఎన్నికల నోటీసులు జారీ చేయనున్నారు. అనంతరం 23న మున్సిపల్‌ కార్పొరేషన్లలో డిప్యూటీ మేయర్లను, మున్సిపల్, నగర పంచాయతీల్లో వైస్‌ ఛైర్‌పర్సన్లను ఎన్నుకోనున్నారు. సంబంధిత స్థానిక సంస్థలకు ఎన్నికైన వార్డు సభ్యులు ఈ ఎన్నికల్లో ఓటు హక్కు వినియోగించుకోనున్నారు. అనివార్య కారణాలతో 23న ఎన్నికలు నిర్వహించడం సాధ్యం కాకపోతే, మరుసటి రోజు 24న ప్రక్రియను పూర్తి చేయాలి. ఎన్నికల నిబంధనలు, చట్టపరమైన మార్గదర్శకాలను పాటిస్తూ పారదర్శకంగా, నిష్పక్షపాతంగా ఎన్నికలు నిర్వహించాలని అధికారులకు పునేఠా సూచించారు.