ఘోర రోడ్డు ప్రమాదం - ఒకరి మృతి

- నలుగురికి తీవ్ర గాయాలు

ప్రజాశక్తి-బైరెడ్డిపల్లి : చిత్తూరు జిల్లా బైరెడ్డిపల్లి మండలంలోని జాలరిపల్లి సమీపంలో బుధవారం ఉదయం ఘోర రోడ్డు ప్రమాదం చోటుచేసుకుంది. తమిళనాడుకు చెందిన ఓ కారు అదుపుతప్పి రోడ్డు పక్కన ఉన్న కాలువలో పడిపోవడంతో డ్రైవర్ తౌఫిక్(24) అక్కడికక్కడే మృతి చెందినట్లు స్థానికులు తెలిపారు. ఈ ప్రమాదంలో కారులో ప్రయాణిస్తున్న అబు, జగుల్, దవలత్, అనిఫా తీవ్రంగా గాయపడ్డారు. తమిళనాడులోని నమక్కల్ జిల్లా ఈరోడ్ ప్రాంతం నుంచి చిత్తూరులో జరిగే ఇస్తిమా కార్యక్రమానికి వెళ్తుండగా ఉదయం సుమారు 11 గంటల సమయంలో ఈ ప్రమాదం జరిగినట్లు సమాచారం.

ప్రమాదాన్ని గమనించిన స్థానికులు వెంటనే స్పందించి క్షతగాత్రులను బయటకు తీసి 108 అంబులెన్స్‌కు సమాచారం అందించారు. 108 సిబ్బంది క్షతగాత్రులను పలమనేరు ప్రభుత్వ ఆసుపత్రికి తరలించి చికిత్స అందిస్తున్నారు. ప్రమాదానికి సంబంధించిన పూర్తి వివరాలు తెలియాల్సి ఉంది.